Përditësuar/ Njëzet e tre vjeçari shqiptar, i cili u arratis një ditë më parë nga burgu i Avlonas në Greqi është arrestuar, raportuan këtë të martë mediat helene.
Albino Xhezairi u kap në Omonia, sipas të njëjtave burime. Ndërkohë, siriani, i cili u arratis bashkë me shqiptarin, është ende në kërkim.
Xhezairi raportohet se ishte dënuar me 16 vjet burgim për për trafik droge.
Ai u arrestua në Athinë në muajin Maj 2017 si pjesë e një grupi kriminal. Roli i tij ishte të merrte dhe transportonte lëndën narkotike në kufirin shqiptaro-grek.
23-vjeçari Xhezairi është person i kërkuar edhe në Shqipëri. Ai akuzohet si pjesëmarrës në vrasjen e Aleksandër Bardhit, ngjarje e ndodhur më 24 Shtator 2016 në fshatin Shëndëlli të Sarandës. Lidhur me këtë krim, në atë kohë u arrestuan dy të rinj, ndërsa Albiano Xhezairi ishte shpallur në kërkim pasi nuk ishte kapur. Në banesën e tij policia gjeti 3 automatik model 56 dhe 3 karikatorë me fishekë, që pas ekzaminimeve laboratorike u provua se njëri prej tyre ishte përdorur për vrasjen e 47-vjeçarit Aleksandër Bardhi. Disa ditë para ekzekutimit të tij, 3 armët ishin përdorur për qitje në të njëjtin vend.
Në Dhjetor të vitit 2016, Albiano Xhezairit i vrasin babain. Agron Xhezairi u ekzekutua me breshëri arme në derën e banesës së tij në Ksamil. Dyshimet janë se ai u vra për hakmarrje, pasi djali i tij është i dyshuari kryesor për vrasjen e Aleksandër Bardhit.
Shtypi grek shkruan se 23-vjeçari shqiptar është pjesë e “Mafias së burgjeve”. Ai vuante dënimin në burgun e Koridhalos dhe dyshohej si pjesëmarrës në një vrasje brenda këtij burgu. Më pas u transferua në burgun e Avlonas pas episodeve që kishin ndodhur në Koridhalo.
Ndërkohë, Ministria greke e Drejtësisë ka nisur një hetim të brendshëm për të zbardhur rrethanat e arritjes nga qelia të dy të burgosurve.
***
“Pjesë e mafies së …”/ Kush është shqiptari që u arratis nga burgu grek
Zbardhet identiteti i shqiptarit i cili u arratis një ditë më parë nga një burg në Greqi. Sipas raportimeve të mediave greke, ai është me iniciale A.Xh. Shqiptari bashkë me një sirian me inciciale A.A., arritën të arratiseshin nga qelia. Media greke Zougla ka publikuar foton e dy personave tanimë në kërkim nga autoritet helene.
Ngjarja
Të dy u arratisën mbrëmjen e së hënës nga burgu i Avlona në Greqi. Sipas grekes Kathimerini, ngjarja ndodhi rreth orës 21:40. Dy të burgosurit u arratisën nga qelitë e burgut të tyre në rrethana ende të paqarta.
Mësohet se jashtë perimetrit të burgut ndodhej një oficere policie, e cila pasi dalloi të burgosur teksa po arratiseshin qëlloi në ajër në mënyrë që t’i trembte. Në këtë moment një prej tyre u rrëzua për pak çaste në tokë, por më pas u ngrit dhe e goditi policen në fytyrë, duke u larguar më pas me shpejtësi.
Një prej tyre, i moshës 22-vjeçare, sipas të përditshmes greke dyshohet se është pjesë e të ashtuquajturës “mafia e burgjeve” në Koridhalo. /Boldnews.al/
