Të enjten e kaluar, Ervis Meço, sekretari i Përgjithshëm i partisë për Europianizim dhe Integrimin e Shqipërisë, mori mandatin e deputetit nga lista vijuese e PD-së.
Por me një deklaratë për shtyp PEISH shprehet se kanë firmosur marrëveshje e re të bashkëpunimit opozitar me Lulzim Bashën dhe Partinë Demokratike dhe se kush shkel apo refuzon zbatimin e vendimeve politike të PEISH-it, humbet automatikisht anëtarësinë në parti.
Për këtë arsye kanë përjashtuar nga partia deputetin më të ri në Parlament Ervis Meço dhe se ai nuk mundet ta përfaqësojë në Kuvend e askund siglën dhe përfaqësinë e PEISH.
Deklaratë për Shtyp:
PEISH prej marsit të vitit 2017 i është bashkuar me vendim politik e me vullnet të lirë Koalicionit Opozitar dhe Aleancës me Lulzim Bashën dhe Partinë Demokratike.
Ne si PEISH kemi firmosur gjithashtu edhe marrëveshjen e re të bashkëpunimit opozitar me Lulzim Bashën dhe Partinë Demokratike. Vendimet politike të PEISH janë të detyrueshme për çdo anëtar dhe drejtues të PEISH-it. Kush shkel apo refuzon zbatimin e vendimeve politike të PEISH-it, humbet automatikisht anëtarësinë në parti e për rrjedhojë edhe çdo funksion a të drejtë në Partinë tonë. Sikurse e kemi ndjekur, ditën e enjte është betuar duke marë mandatin e deputetit nga lista vijuese e PD, ish – Sekretari i Përgjithshëm i PEISH z. Ervis Meço. Qytetari Ervis Meço ka të drejtë të bëjë ç’të dojë me vendimet dhe vullnetin e tij personal politik, por kurrësesi nuk mund të gëzojë më asnjë të drejtë në PEISH duke qenë se ai ka humbur tashmë automatikisht anëtarësimin e tij dhe çdo funksion brenda PEISH. Deputeti i listës vijuese të PD Ervis Meço nuk mundet, nuk duhet dhe nuk do ta përfaqësojë në Kuvend e askund siglën dhe përfaqësinë e PEISH. Ai tashmë është një qytetar i lirë, jo anëtar e as drejtues e asgjë në PEISH. Vetëpërjashtimi i tij është edhe fundi i marrëdhënies së tij politike me PEISH.
