Vjedhja më e madhe e shekullit ka shifra të frikshme. Më shumë se 1,260 miliardë euro të destinuara për 28 shtetet e Bashkimit Europian u zhdukën në tetë vjet, mes viteve 2009 dhe 2016 dhe vetëm një pjesë e vogël janë gjetur.
Një lumë parash, aq i madh sa PBB-ja e Australisë, e cila duhej të mblidhej nga autoritetet tatimore të vendeve europiane në formën e Tatimit mbi Vlerën e Shtuar (TVSH), por që u zhduk dhe kurrë nuk u rishfaq, shkruan Il Sole 24 Ore.
Paratë e TVSH-së që mungojnë janë shumë: 213.8 miliardë euro në gjashtë vjet, në mes 2011 dhe 2016. Teknikisht quhet “Vat Gap”, ku Vat është ““Value added tax”, – Tatimi mbi Vlerën e Shtuar, dhe hendeku është diferenca në mes të TVSH-së që duhet paguar dhe asaj që paguhet aktualisht. Vetëm në vitin 2016 (viti i fundit në të cilin ka të dhëna homogjene) shuma që nuk është mbledhur nga Thesari ishte 34.8 miliardë në Itali dhe 147.1 miliardë në të gjithë Bashkimin Europian, një shifër pak më e ulët se buxheti i BE. Është sikur qarkullimi i përgjithshëm i General Motors, kompania më e madhe e automobilave në Shtetet e Bashkuara, të zhduket në një goditje.
50 miliardë të marra me mashtrim
50 miliardë euro janë hequr çdo vit nga taksapaguesit europianë. Duke qarkulluar mallra dhe shërbime në të gjithë kufijtë e brendshëm të Bashkimit Europian, mashtrues, kriminelë, madje edhe terroristë po marrin para nga buxhetet publike. Mashtrimi i tyre: të rikuperojnë taksa që nuk janë paguar kurrë. Dhe arma që ata përdorin është mashtrimi me karusel mbi TVSH-në. Ndonëse këto mashtrime kanë qenë të njohura nga autoritetet tatimore euopiane që nga futja e TVSH-së në vitin 1993, nuk është ndërmarrë thuajse asnjë masë në nivel global për të zvogëluar efektivisht shumën e këtyre humbjeve. Pamundësia e shteteve anëtare të BE-së që të bien dakord unanimisht për çështjet e taksave dhe mungesën e besimit të ndërsjellë, vjen me kosto të taksapaguesve të shumtë.
