Nga Boldnews.al
Për të katërtën ditë rresht, kryeministri Edi Rama i është drejtuar me letra publike kryeopozitarit Lulzim Basha për tu ulur në dialog, sigurisht me kushte kryeministrore. Stili është i njëjtë, fjalori gjithashtu, por ndërsa kriza e madhe ka kapur vendin, faktori ndërkombëtar e ka braktisur dhe fundi politik po i afrohet, kryeministri po tenton edhe një herë të fundit që të mbahet.
Në të katër letrat, thelbi mbetet ulja në dialog, me kushtin që Rama nuk dorëhiqet dhe që zgjedhjet lokale nuk shtyhen. Pas këtij kushti ka një parakusht të bërë publik prej katër muajsh nga Basha: Largim i Ramës së kryeministër, krijimin e një qeverie kalimtare teknike dhe mbajtjen e zgjedhjeve të reja Parlamentare të parakohshme.
Koha nuk pret, ndaj kryeministri nuk ka ç’të ofrojë. Nga mania për të marrë çdo pushtet, duke i pasur të gjitha në duar, sot po i kthehen në vetëvrasje politike. Legjislativin (Parlamentin), e ka kthyer në një sallë teatri tragjikomik, ku dy herë në javë, shfaqen aktorë të dobët, me nivel minimal intelekti dhe me integritet moral të dyshimtë.
Në ekzekutiv (qeveri), Rama po i “urren” ata ministra të tij që sot nuk po i japin asnjë dorë për të dalë nga bataku. Këta të fundit nuk është se nuk duan ta shpëtojnë shefin e tyre, por kapacitetet u mungojnë. Janë thjesht të sterilizuar në mendje dhe gjenden aty vetëm nga dëshira e Ramës dhe jo nga merita e tyre. Duan, por nuk dinë.
Median kryesore e ka në duart e tij, ata po i bëjnë propagandë në favor çdo ditë, por edhe televizionet kombëtare janë aq të dobët para medias ndërkombëtare, sa po dorëzohen ende pa “nisur beteja”. Nuk e mundin dot median botërore kryesisht gjermane, ZDF, BILD, ARD, apo DW, shtuar këtu edhe disa media franceze dhe italiane. Edhe këtu dështim. Rama i ka po nuk i vlejnë!
Drejtësinë, këtë e ka mbërthyer jo me një, por të dyja duart. E deshi atë të shkretë prokurori, e mori, e siguroi, mbylli çdo dosje kundër Rilindasve të tij, por kreu vetëvrasje politike, kur nën delirin e madhështisë, kërkoi të fundoseshin dosjet 184 dhe 339/1 që fshihnin dyshimet e forta dhe provat për shitblerjen e votave. Dashuria me kapjen e institucionit të akuzës sot i është kthyer në urrejtje, pasi ata dhënë më shumë nga çfarë kërkoi shefi i madh në krye të qeverisë. Duke tentuar ta “pastronin” nga çdo mëkat i “ropën” lëkurën dhe e nxorën zbuluar pa dashjen e tyre edhe në arenën ndërkombëtare.
I rënë para opinionit kombëtar dhe ndërkombëtar, “kryeministri shëtitës” kërkon shpëtim në zona që mendon se janë të përbetuar për Rilindjen. Por edhe aty do dalin qindra apo mijëra protestues që i presin udhën dhe ia nxjerrin mllefin. I strukur në makinën kryeministrore, të vetmin aleat ka telefonin dhe internetin.
Aty nis letra, kenaqet deri në esktazë prej vetes, nga përroi psikik i të shkruarit dhe nën delir, futet në botën haluçinative, edhe sot ia hodhz, do ta mposht, do e shohin kush jam…!
Në fakt duket se është fundi, i ngjashëm me atë të një kafshe shumë e dashur shtëpiake, që kur i vjen momenti i largimit prej të gjallëve, nis të bëhet më i dashur me “familjen Rilindase” dhe në fund ikën disi larg për të dhënë frymë, diku në një qoshëze ferre.
