Partizani po përgatitet për ndeshjen e së dielës me Kukësin, por katër futbollistë të skuadrës që nga fillimi i javës janë bërë pjesë e grumbullit të ekipit kombëtar, të drejtuar nga trajneri Edi Reja. Alban Hoxha konsiderohet i përhershëm te kuqezinjtë, në grumbullimin e fundit me Panuçin u shtua edhe Lorenc Trashi, i cili pati këmbën e mbarë se pas tij në Kombëtare u thirrën edhe Bruno Telushi dhe Esat Mala.
Të kuqtë po e shijojnë grumbullimin me Kombëtaren dhe Trashi, Telushi dhe Mala, për “SuperSport” kanë treguar emocionet kuqezi, por pa anashkaluar sezonin e mrekullueshëm që bënë me Partizanin.
LORENC TRASHI- “Të tregohemi të sinqertë, edhe po të mos dilnim kampionë, do të merrnim ftesë nga Kombëtarja. Duke parë që derbi ka folur më shumë për ne, emocionet do të jenë më të forta edhe të dielën ndaj Kukësit. Mezi e kemi pritur. E pyeta presidentin Demi për festën. Më tha se do të bëjmë diçka që nuk do të harrohet kollaj”, deklaroi Lorenc Trashi.
BRUNO TELUSHI- “Edhe për mua ftesa ishte diçka e papritur. U ndjeva shumë i gëzuar dhe ishte emocionuese se erdha bashkë me shokët e ekipit dhe kjo të bën të ndihesh pak më mirë. Është diçka shumë e mirë për ne dhe klubin e të bën të ndihesh mirë, por mendoj se kemi shfaqur veten në ndeshjet që kemi bërë dhe arritja e objektivit pas shumë vitesh të bën të jesh këtu. A do jem në listën përfundimtare?
Këtë do ta tregojë lista e dytë dhe varet nga ajo që ka parë trajneri në këto stërvitje. Unë dëshirën e kam se është ëndërr për mua, shpresoj që të jem. Festa e titullit? Pas derbit bëmë një festë për arritjen e objektivit, por kjo tjetra do të jetë madhështore, do jetë trofeu që është qershia mbi tortë e të bën të ndihesh mirë”, u shpreh mesfushori vlonjat për “SuperSport”.
ESAT MALA- “Si djalë i ri, isha shumë i surprizuar, një hap i mirë për mua dhe një mundësi për karrierën time që mund të më vlejë shumë dhe do të mundohem ta shfrytëzoj. Që ne të katërt të jemi këtu, Partizani ka bërë të veten. Më të mirët ftohen, me paraqitjet tona besoj se e kemi merituar grumbullimin. Festa? Derbi ka ndjenja të veçanta, por fitimi i titullit kampion ka ndjenjë tjetër. Në aspektin profesional është për herë të parë dhe jam shumë i gëzuar për të gjithë që e arritëm”, u shpreh Esat Mala.
