Titulli kampion pas 26 vitesh i mbush arkën Partizanit, teksa 1 milion euro janë të sigurta prej shpërblimeve që jep UEFA, por edhe FSHF. Klubi i kuq arkëton një shifër rekord, sepse këtë herë përfiton shuma të majme vetëm për pjesëmarrjen në Ligën e Kampioneve, nisur edhe nga vendimi që ka marrë qeveria europiane e futbollit. Pra, edhe nëse Partizani nuk arrin të kalojë një tur në Ligën e Kampioneve apo Ligën e Europës, merr 800 mijë euro neto nga UEFA.
Nga ana tjetër, institucioni i futbollit shqiptar ka një shpërblim modest prej 100 milionësh, ndërsa më tepër është shitja e së drejtës TV, ku Partizani si kampion merr pjesën e “luanit”, afërsisht 120 mijë euro. Por si ndahen shpërblimet e UEFAs? Kjo e fundit e ka të përcaktuar qartë në vendimet që ka marrë për shpërblimet e klubeve që marrin pjesë në kompeticionet europiane. Partizani e nis nga turi i parë i Ligës së Kampioneve dhe shpërblimet për të cilësohen si pagesa solidariteti. Çdo klub kampion në Europë merr fillimisht si shpërblim nga UEFA 260 mijë euro.
Kjo shumë nuk akordohet vetëm në rast se Partizani futet në fazën e grupeve të Ligës së Kampioneve ose Ligës së Europës. Ndërsa vetëm për pjesëmarrjen në turin e parë të Champions-it, të kuqtë përfitojnë edhe 280 mijë euro të tjera. Nëse eliminohen në këtë raund, “demat” kanë edhe një shans, por në turin e dytë të Ligës së Europës. Fakti që marrin pjesë në këtë raund kualifikues, bën që klubi të shpërblehet edhe me 260 mijë euro të tjera. Por çfarë ndodh nëse Partizani kalon turin e parë të Ligës së Kampioneve?
Të kuqtë do të shpërblehen me 380 mijë euro vetëm për pjesëmarrjen në turin e dytë dhe nëse eliminohen në këtë raund, atëherë do të vazhdojnë garën në turin e tretë të Ligës së Europës. Këtu përfitojnë edhe 280 mijë euro të tjera. Pra, në rastin më të mirë, nëse kalon një tur në Champions, Partizani përfiton në total vetëm nga UEFA 1.2 milionë euro, pa përfshirë këtu premion e FSHF-së dhe të drejtën televizive.
