Mos kujtoni se pas protestës së 25 majit deri më 30 qershor do të kemi një situatë me ujëra të qeta. Kështu u shpreh mbrëmjen e sotme në “Opinion”, kreu i LZHK-së, Dashamir Shehi, duke shtuar se opozita dhe qytetarët do të protestojnë pa pushim.
“Do të protestohet pa pushim deri më 30 qershor. Protesta e 25 majit do të jetë masive, do të mblidhen 100 mijë apo më shumë, s’ka rëndësi, por protestat do të vazhdojnë.
Kemi 4 muaj që protestojmë se janë bërë disa demostrata të mëdha në Tiranë dhe s’ka pasur dhunë.
Nuk kanë ndodhur incidente më të mëdha sesa thyerja e ndonjë xhami apo hedhja e ndonjë shisheje me benzinë dhe kjo duhet vlerësuar.
Madje edhe këto incidente që kanë shqetësuar ca ambasadorë në Tiranë mund të jenë shkaktuar nga provokatorët që janë mes protestuesve.
Por mos kujtoni se shqiptarët durojnë gjatë, s’kanë duruar kurrë kaq gjatë. Po vjedh shqiptarët, janë 500 apo 600 mln euro që pritet të jepen me koncensione, kush do i paguajë këto para?”, tha Shehi.
