Duke ditur që javën e fundit korçarët marrin pikët pa luajtur për shkak të dënimit të Kamzës, gjithçka varet nga kjo përballje. Në ndeshjen e kësaj fundjave është përqendruar e gjithë vëmendja e Skënderbeut, pasi Europa kalon nga kjo rrugë. Ajo që vlen të theksohet është fakti se në ndeshjen ndaj Luftëtarit fitorja është e vetmja mundësi e Skënderbeut për të qenë në garë. I këtij mendimi është edhe Marko Pervan, mesfushori kroat i Skënderbeut.
Në një prononcim për “Panorama Sport”, Pervan ka theksuar se fitorja ndaj Kukësit i ka shërbyer ekipit për t’u kthyer besimin pas atyre dy javëve jo të mira që komplikuan garën për titull. Duke u nisur edhe nga kjo, Pervan ka theksuar se edhe një sforco e fundit mbetet që ekipi të finalizojë atë që kërkon prej fillimit të sezonit dhe më pas i mbetet të presë verdiktet e kampionatit.
“Vijmë nga një fitore që na ka kthyer besimin e këtij fundsezoni. E them kështu, pasi u kthyem nga dy humbje me shumë peshë. Fillimisht çuam dëm Kupën në atë humbje në shtëpi me Kukësin dhe më pas kampionatin e vumë shumë në vështirësi me disfatën ndaj Teutës. Ishte një moment mjaft i sikletshëm, pasi nuk dolëm dot në rrugën tonë në atë ndeshje finale për sezonin. Ishim të vrarë, por gjetëm forcën që të reagonim dhe ia dolëm. Ishte një moment i vështirë, punuam shumë gjatë këtyre ditëve për t’ia dalë mbanë.
Ana morale ishte ajo pjesa më e vështirë për ne, por u ringritëm. Ky është një grup fantastik dhe është mëkat që jemi në këtë pozicion. Ndaj Kukësit kemi zhvilluar një ndeshje të madhe, të përqendruar dhe në kërkim të rezultatit të vetëm që na hynte në punë. Të njëjtën gjë do të bëjmë edhe ndaj Luftëtarit. Për ne është ndeshja e fundit, por shumë e rëndësishme. Jemi dy ekipe që kemi mungesa për shkaqe të ndryshme, gjithsesi ne duhet të shohim vetëm fushën dhe asgjë tjetër. Një fitore me Luftëtarin na hap rrugën për Europë, më pas presim vetëm verdiktet e sezonit në javën e fundit”, theksoi Pervan.
E ARDHMJA- Kroati më pas u ndal edhe te ky gjysmësezoni që ka luajtur me Skënderbeun për të analizuar arritjet dhe pritshmëritë për vitin e ardhshëm. Ai la të kuptohet se është ndierë mirë në Korçë, pavarësisht disa problemeve të vogla fizike që ka pasur dhe nuk e kanë lënë të japë më të mirën. Ndërsa nga ana tjetër ia kaloi topin Skënderbeut për sa i përket të ardhmes së tij.
“Në lidhje me këtë gjysmësezoni në Korçë do të dëshiroja që të ishte më i mirë. Erdha këtu për të kapur garën e titullit dhe për të çuar Skënderbeun sa më lart, por për fat të keq nuk ishte e mundur. Në aspektin personal kam gjetur ngrohtësinë e një ekipi të bashkuar që në fillim, sapo kam mbërritur. Mund ta quaj një sezon deri diku të mirë. E them këtë për shkak të disa problemeve fizike që nuk më lanë të tregoja të plotë potencialin tim. Tani mbetet vetëm të shihet se çfarë do të ndodhë. E gjitha është në dorë të klubeve. Nëse Skënderbeu kërkon të më ketë në ekip, e di mirë se çfarë duhet të bëjë dhe si duhet të lëvizë. Unë do të qëndroja me dëshirë këtu për të treguar plotësisht vlerat e mia”, u shpreh Marko Pervan për “Panorama Sport”.
/Panorama Sport
