I izoluar ndërkombëtarisht, me një presion në rritje për shkak të protestave qytetare dhe opozitës, kryeministri Edi Rama duket se po gjen zgjidhje te shokët e babait të tij, Kristaq Ramës.
Media në tërësi, e mësuar për t’iu vënë në shërbim Edi Ramës, nuk po gjen mundësinë sesi mund të shpëtojë nga sikleti kreun e qeverisë, të cilit jo vetëm po i mungon suporti i brendshëm, por prej muajsh ndodhet në një izolim të plotë.
Edhe në samitin e fundit, atë të zhvilluar në Berlin, Rama u ndje i vetmuar, ndërsa në krah të tij pati Hashim Thaçin dhe Alekandar Vuçiç. Por për shkak të tezës dhe pozicionimit të tij për ndryshim kufijsh mes Kosovës dhe Serbisë, ai dhe plani që mbështeti, morën shuplakë nga mikpritësja e samitit, kancelarja Merkel dhe bashkëorganizatori, Presidenti Macron.
I denoncuar ndërkombëtarisht për lidhjet me krimin, i vetëdenoncuar për lidhje me persona me precedent kriminalë, pas ii kandidoi për deputetë dhe kryebashkiakë, i kryqëzuar nga mediat ndërkombëtare, i kapur në përgjime nga organet ligjzbatuese duke blerë vota, sot Rama përmes mediave po mundohet të rregullojë imazhin, duke rrëfyer histori nga koha kur ka qenë 5 muajsh.
Këtë shërbim ka arritur duke siguruar rrëfimet e shokëve të babait, pasi shokët e tij, nuk mundet më të rrëfejnë diçka që mund t’a shpëtojë kryeministrin.
Pothuajse të gjithë ata që dikur i kishte miq apo mentor politikë e mediatikë, i kanë dalë kundra, kanë rrëfyer dhe po rrëfejnë veset, duke treguar si e kanë njohur nga afër, duke dhënë përditë në media, fytyrën e vërtetë të një ish-piktori apo ish-basketbollisti, që hyri në politikë me thonj të paprerë dhe po largohet nga politika me akuzën e lidhjeve me krimin, personazhet e botës së nëndheshme, të cilët i shërbyen për të marrë tepsinë dhe timonin e qeverisë.
Mediat sot zgjodhën një personazh të njohur prof. Muntaz Dhrami, (Skulptor i Popullit), i konsideruar ndryshe edhe si legjenda e skulpturës shqiptare, pas të madhit Odhise Paskali.
Në rrëfimin e tij midis të tjerash, prof. Muntazi ka hedhur dritë e ka treguar edhe për miqësinë e ngushtë familjare me të ndierin, Kristaq Rama, duke publikuar edhe disa foto të rralla.
Një prej tyre është dhe kjo foto ku Edi Rama ka dalë në krahët e nënës së tij, Anetës, e cila i përket 55 viteve të shkuara, ku ai nuk ka qenë më shumë se pesë muajsh. Kjo foto është shkrepur nga babai i Edit, i ndieri Kristaq Rama, në studion e skulptorit të njohur, Muntaz Dhrami, koleg dhe mik i ngushtë i tij që nga periudha kur ata ishin nxënës në Liceun Artistik në Tiranë dhe më pas në ish-Bashkimin Sovjetik ku ata kryen studimet e larta në akademitë e arteve të bukura në degën e skulpturës.
Aq e ngushtë ishte miqësia midis tyre, saqë Kristaq Rama, ka qenë në tavolinën kryesore të dasmës së Muntaz Dhramit në vitin 1961, (madje në krah të çiftit), kur ai (Muntazi), kurorëzoi martesën me zonjën Lumturi Shehu Dhrami, shoqe e klasës së Liceut me Muntazin e që më pas u diplomua në Varshavë të Polonisë pranë Akademisë së Arteve të Bukura në degën e grafikës.
Sot profesori po përdoret direkt apo indirekt nga mediat për të rregulluar disi imazhin e kryeministrit.
Kazanët sikundër i quan mediat në Shqipëri, po mundohen t’a zbardhin, duke shfrytëzuar personazhe të njohur dhe ndoshta të nderuar në fushat e tyre, por vështirë se mund të arrijnë kryeministrin e nxirë tashmë ndërkombëtarisht./Boldnews.al/
