Anëtarët e PS-së në Komisionin Qendror të Zgjedhjeve kanë marrë në mbrojtje Bindjen Demokratike të drejtuar nga Patozi, madje duke mos kursyer përplasjet me përfaqësuesin e PD-së në këtë institucion, Ivi Kason.
Ky i fundit ka kërkuar sqarime nga KQZ lidhur me regjistrimin e kandidatëve të Bindjes në zgjedhjet e 30 qershorit, duke vënë theksin në shkeljet ligjore.
Por duket se kjo ka nxehur nënkryetarin Denar Biba, që ka marrë rolin e avokatit në raport me Bindjen.
Debatet në KQZ
Biba: Ju nuk keni të drejtë të pyesni pasi nuk jeni garuesë. Ligji nuk parashikon që të keni status të përhershëm në KQZ. Për sa kohë nuk jeni garues nuk keni legjitimitet.
Kaso: Kemi status të përhershëm si pasojë e zgjedhjeve të fundit. Duhet një vërtetim që provon se partia ka 6 muaj që është në parlament. Pyetja është ligjore, nuk po marr përgjigje.
Nuk ka vlerë interpretimi që po bëhet në media. Mendoj se të dy vërtetimet nuk vlejnë. Lefter Koka, zotëron mandatin, është e vërtetë. Vetëdeklaron se mbështet një parti, por ç’lidhje ka kjo me nenin 68.
