Në transfertën e Durrësit ka ardhur momenti i debutimit të Besnik Feratit, i cili iu bashku të kuqve në merkaton e verës. 19-vjeçari më shumë është aktivizuar në këtë sezon me ekipin e të rinjve dhe Partizanin B.
Ndeshjen e parë zyrtare me Partizanin ai e ka luajtur në Kupë ndaj Kastriotit, ndërsa në kampionat dje i ka ardhur shansi që të debutojë. Fati nuk ka qenë me mesfushorin nga Shkupi, kjo për shumë arsye.
Në ndeshjen e parë në kampionat, Feratit i bie që të luajë si mbrojtës i djathtë dhe jo në rolin e tij natyral, mesfushor shkatërrues. Edhe vetë trajneri Gega e pranoi se filli u këput pikërisht aty ku nuk duhej, pasi Ferati është një lojtar i ri dhe i perspektivës, por që dje u eksperimentua si mbrojtës i djathtë. Besnik Ferati është pjesë e kombëtareve të moshave të Maqedonisë dhe te Partizani shikohet si një lojtar i të ardhmes.
