Nga Boldnews.al
Në fillim të javës, ndërkombëtarë të rëndësishëm në Tiranë pritet të përdorin “vizitën” e Vangjush Dakos në Prokurori për të nxitur Lulzim Bashën të hyjë në dialog me Edi Ramën. “Argumentin” tashmë e kanë gati: Çështjet penale po shqyrtohen në institucione, ndërkohë që politika duhet të gjejë zgjidhjet në tryeza bisedimesh.
Çështja “Dako”, si pjesë e dosjes hetimore “339”, nxiti opozitën të djegë mandatet parlamentare, për shkak të procesit masiv të vjedhjes së votave në zgjedhjet e përgjithshme të vitit 2017 dhe pandëshkueshmërisë së zyrtarëve të “Rilindjes” të përfshirë në veprimtari kriminale.
Kryebashkiaku i Durrësit, i kapur në përgjime duke folur me anëtarëve të bandave kriminale të Shijakut për tjetërsimin e votave, u thirr në Prokurori pas një vonese fenomenale; rreth 8 muaj pasi në media dolën transkipte zyrtare të përgjimeve dhe rreth 2 vjet pas regjistrimit të tyre.
Kryeministri Edi Rama, njëkohësisht kryetar i Partisë Socialiste, i ka konsideruar thashetheme përgjimet zyrtare të Prokurorisë, duke e mbrojtur fuqishëm bashkëpunëtorin e tij të ngushtë, Vangjush Dakon.
Nga ana tjetër, Prokuroria e drejtuar nga Arta Marku, e zgjedhur vetëm me 69 votat e socialistëve, si edhe mikesha e saj në krye të Krimeve të Rënda, Donika Prela, nuk ka luajtur as gishtin për muaj të tërë, më së paku për të pyetur formalisht Vangjush Dakon.
Këto përgjime, të cilat faktonin vjedhjen e votave në vitin 2017, ndërthurur me arrogancën qeveritare dhe korrupsionin e përhapur gjerësisht, detyruan opozitën PD-LSI që të ndërmerrte hapin ekstrem politik, djegien e mandateve.
Në sallën parlamentare pa opozitën reale, Edi Rama tregohet i vendosur se nuk do të pranojë asnjë kusht të opozitës. Por, në fakt, nën rrogoz, ai po vepron për të gjetur një zgjidhje, e cila nuk e prek pushtetin e tij.
Tipike për sjelljen e tij, Rama bëri lëvizjen e parë-ai “dorëzoi” Dakon para prokurorëve. Natyrisht, ky “dorëzim” nuk është aspak i tillë, pasi, nëse prokuroria do të kishte vullnetin për të vepruar, nuk do të priste urdhërin e Edi Ramës.
Por, Rama, si një lojtar i dobët tashmë, shpreson që me “vizitën” e Dakos në Prokurori, të nxisë ndërkombëtarët e Tiranës në krah të tij, që t’i sugjerojnë Bashës uljen në tryezë me kryeministrin.
Por, nëse Rama “shiti” Dakon, a do të veprojë në të njëjtën mënyrë me Gjiknurin, Ulsi Manjën, etj etj, për të bindur Bashën dhe opozitën për t’u ulur në bisedime?
Këtë duhet të mbajnë parasysh ndërkombëtarët e Tiranës, të cilët pritet t’i afrohen Bashës me “kokën politike” të Dakos.
