Kreu i bashkisë së Durrësit, Vangjush Dako, është thërritur ditën e enjte nga Prokuroria e krimeve të Rënda, ku është pyetur në lidhje me përgjimet e ‘Dosjes 339’.
Lajmi është bërë i ditur nga gazetarja Anila Hoxha.
“Hetimet për dosjen Vol-vo 4 kanë marrë një kthesë dramatike. Gjatë ditës së sotme është refuzuar kërkesa e Niçes për lirim, duke u lënë në arrest me burg. Burime të Top Channel kanë bërë të ditur se zoti Dako është pyetur gjatë së enjtes nga ora 15 deri në orën 20. Ato nuk japin asnjë detaj gjatë kësaj seance, nga prokurorët Vladimir Meçe dhe Dritan Premçi. Janë marrë në pyetje edhe drejtues të tjerë lokalë. Për shumë persona janë zbardhur mjaft përgjime, për sa kohë që siç tha Arta Marku janë 700 CD të pazbardhura. Hetimet janë regjistruar për një sërë veprash penale, nga trafiku i drogës e deri te ato të lidhura me çështjet e zgjedhjeve. Në përgjime kanë dalë edhe gjyqtarë dhe prokurorë. Hetimet janë mjaft sekrete, por kryebashkiaku i Durrësit është pyetur në cilësinë e personit që është në dijeni”, tha Anila Hoxha.
