Nga Boldnews.al
Pluralizmi politik erdhi me shumë mundim në Shqipëri, por 29 vite pasi shumëpartitizmi dhe alternativat përzgjedhëse shfaqeshin në fletët e votimit, ka ndryshuar gjithçka. Në daljen e fundit publike, në mbrëmjen e djeshme, kryeministri Edi Rama, me fytyrë të zverdhur, por me energji, (ka disa dyshime që mund t’i ketë ardhur nga një ‘pluhur çudibërës), u shpreh i vendosur për të mbajtur zgjedhjet lokale më 30 qershor.
Pa pjesëmarrjen e opozitës zyrtare, e mbi të gjitha pa kandidatë alternativë në përzgjedhje. Nuk mund të jetë rastësi që 29 vite pas përmbysjes së siatemit komunist, në qeverisje është e majta socialiste, e dalë si vijimësi e Partisë së Punës së Shqipërisë, e cila ka kthyer pushtetin absolut, me një parti të vetme, Rilindjen e tij.
Me situatën e krijuar, gjithçka opozitës iu pamundësua të kishte një garë të ndershme, duke zgjedhur rrugën e bojkotit. Dhe kjo për kryeministrin nuk është problem. Sipas tij, njerëzit do të votojnë të vetmen alternativë, kandidatët e tij të Rilindjes. Ka ndodhur e paimagjinueshmja, që atë që shqiptarët e fituan me vuajtje dhe gjak, në përmbysjen e një sistemi dictatorial, po u rikthehet me uzurpimin e të gjithë institucioneve nga ana e qeverisë së Edi Ramës.
Legjistativi është kthyer në një “robokop” që merr urdha nga kryeministri Edi Rama. Sa herë i nevojiten votat, kartonët jeshil janë shtuar edhe me emërimin e “opozitës së re”. Gjithashtu legjislativi mbetet edhe më i rëndë, kur në kabinetin e tij Rama u ka dhënë poste të rëndësishme ministrore njerëzve anonim, që përkulen deri në rënien në gju pas çdo kërkese të kryeministrit.
Pushteti gjyqësor (drejtësia), tashmë nuk ka asnjë dyshim që mbetet nën kontrollin e tij të plotë. Ato 69 vota të Rilindjes në vitin 2018 sollën në krye të Prokurorisë së Përgjithshme të përzgjedhurën e Rilindjes, Arta Markun.
Dosjet hetimore të zyrtarëve të lartë publik janë mbyllur, ose mbahen të arkivuara pa asnjë hetim që do të nxirrte përgjegjësitë e tyre si në shitblerjen e votave ashtu edhe të implikimit të drejtëpërdrejtë të zyrtarëve të lartë të Rilindjes me elementë të krimit, kryesisht trafikantë droge.
Pasi futi në duar çdo “institucion të pavaruar”, Rama tashmë po tenton të asgjësojë edhe pluralizmin partiak. Shitblerjet masive të votave, përdorimin e botës së krimit për të mbledhur vota dhe dërguar në hambarin e partisë dhe mungesa e institucioneve të pavaruara ishin shkaqet që opozita zgjodhi rrugën e bojkotit dhe paralajmëron se do të pamundësojë zhvillimin e zgjedhjeve farsë.
Për Ramën është një lloj sporti, që të jetë tërësisht i vetëm edhe në politikë, pa llogaritur pasojat, pasi opozitarizmin nuk mundet që ta shuajë dhe burgosë masivisht, pavarësishët nga cila parti e grupime politike përfaqësohen. Nëse në mënyrë të njëanshme do të shkojë në zgjedhjet lokale, atëherë mbetet fundi i një sistemi politik demokratik. Zyrtarisht do jemi jo më në një regjim autoritar, por në kufijtë e diktaturës.
