Partia Demokratike është rikthyer sot në KQZ, përmes përfaqësuesit të saj, Njazi Kosovrastri. Prania e z.Kosovrasti në mbledhje është shoqëruar me debate, me kreun e KQZ, Denar Biba.
DEBATI
“Duke mos qene subjekt zgjedhor, interesi juaj është një me gazetarët. Ju uroj mirëseardhjen këtu. Ju nuk jeni subjekt zgjedhor”, iu drejtua Biba Kosovrastit, i cili në përgjigje iu drejtua me një pyetje kreut të KQZ.
“Sipas jush ku duhet të jem”– tha Kosovrasti ndërsa shtoi se: “Jam parti parlamentare dhe kam të drejtë të marr pjesë në mbledhjet e KQZ. Të drejtën ma jep kodi zgjedhor”.
PD rikthehet në mbledhjet e Komisionit Qëndror Zgjedhor pas tri muajsh, kohë në të cilën opozita e bashkuar vendosi të djegë mandatet parlamentare.
Një ditë më parë, Partia Demokratike dhe LSI dërguan komisionerët e tyre në KZAZ. Sekretari i Përgjithshëm të PD Gazment Bardhi tha se vendimi i partive opozitare është bërë pasi kanë informacione se PS po manipulon që tani procesin zgjedhor.
“Partia Demokratike dhe Lëvizja Socialiste për Integrim kanë informacion zyrtar se në KZAZ janë duke u kryer manipulime të rënda të procesit zgjedhor, që nis me regjistrim të paligjshëm të kandidatëve për kryetar bashkie. Për këtë arsye, për të dokumentuar dhe çmontuar këtë paligjshmëri, PD dhe LSI, mund të shfrytëzojnë ligjin, për të dërguar anëtarët që i takojnë në KZAZ për të provuar ligjërisht që Edi Rama nuk garanton zgjedhje legjitime, edhe kur nuk ka kundërshtarë përballë. Në ditët në vijim do të faktojmë të gjitha paligjshëmritë e kryera nga përfaqësuesit e Edi Ramës gjatë procesit”, u shpreh Bardhi.
Në bazë të ligjit zgjedhor, KZAZ ndahen në 50 përqind shumicë nga opozita dhe 50 përqind shumicë nga mazhoranca. Kjo do të thotë që në rastet kur opozita ka shumicën mund të bllokojë procesin në rastet e shkeljeve ligjore që evidentohen. Duket se kjo do të jetë edhe strategjia që do të përdoret nga opozita në kuadër të nismës së saj për zgjedhje të lira dhe të ndershme. Mundësia për të pasur anëtarë në komisione krijon lehtësira lidhur me ndjekjen e procesit, evidentimin e shkeljeve dhe parregullsive, por edhe bllokimit nëse nuk reflektohet./bn/
