Kjo që shihni në foto është studentja që u burgos nga amabasadori i OSBE Bernd Bochardt, për një fjali të shkruar në mur. ‘Turp të kesh’ i tha Ana, një vajzë e re ambasadorit që sipas saj dhe shumë të rinjve që janë angazhuar për të bërë një ndryshim në këtë vend, po i mban peng të ardhmen dhe shanset e të rinjve.
Në botën perëndimore, andej nga edhe vjen ambasadori i OSBE-sw, shkrimet në mure me çfarëdo lloj përmbajtjeje qofshin, nuk janë asgjë tjetër veçse grafiti,por me ndryshimin që atje nuk arrestohesh ndërsa në Shqipëri trajtohesh si shpërndarës traktesh.
Zyrtari i lartë i familjes europiane, në të cilën aspirojmë të bëhemi pjesë, nuk e mendoi dy herë të akuzonte e më pas të arrestonte një studente e cila nuk bëri asgjë tjetër përveçse shkroi një mesazh, tregoi zërin e saj si përfaqësuese e një brezi që thjeshtë nuk duron dot më.
Po kush është vajza që si Hirushja, brenda natës e pa veten nga një studente, aktiviste dhe e re e këtij vendi pas hekurave? Ajo quhet Ana Hazizaj dhe është thjeshtë 24 vjeçe por krimi i saj i vetëm ishte guximi. Një parrullë e shkruar ‘ Shame on You’ në murin e pallatit të ambasadorit e ka terrorizuar jo vetëm ambasadorin por edhe gjithë klasën politike që nuk nguroi të trajtonte një studente si një kriminele.
Por, Ana Hazizaj me siguri nuk habitet as me arrestimin e saj , pasi vetëm disa muaj më parë ajo ka qenë pjesë e protestave studentore duke u pozicionuar në rreshtat e parë të atyre që nuk e pranuan dhe e refuzuan me çdo kusht nëpërkëmbjen e dinjitetit të studentëve. Më siguri që Ana, nuk ka përbrenda kaq shumë mllef e inat sa një ambasador në moshë të thyer, i cili i trembet një 24 vjeçare që guxon të rebelohet. Me siguri që Ana nuk do të hakmerrej nga politikës siç kjo e fundit bëri me të, por Ana nuk do ta harrojë kurrë dhe bashkë me të edhe moshatarët e saj, se burgu i vërtetë i të rinjve shqiptarë dhe atyre që guxojnë të ngrenë zërin, nuk qenkan hekurat, por ata që e drejtojnë e bëjnë sikur e duan Shqipërinë.
