Mjaftoi një artikull i gazetës më të madhe gjermane, që sot e gjithë Rilindja të mobilizohej me çdo mjet të sajin, për të reaguar ashpër, madje duke hedhur dhe akuza të forta në drejtim të prestigjiozes “Bild”, duke e quajtur atë një “media të paguar”.
Çfarë tha në artikullin e saj BILD?
Asgjë më shumë nga sa është thënë në 6 vitet e qeverisë së Rilindjes, që Shqipëria është kthyer në laborator droge, duke u bërë furnizuesi më i madh për Europën e lëndëve narkotike.
Çfarë dinë gjermanët, që po tremben kaq shumë Rilindasit?
Edhe pse sot flitet në çdo cep të Shqipërisë, se krimi është i lidhur ngushtë me politikën, nuk ka një akuzë konkrete nga Prokuroria (Edhe pse ekzistojnë me dhjetëra dosje dhe fakte), pasi siç dihet Drejtësia vijon të jetë ende nën kontrollin e ashpër të pushtetarëve.
Por nëse prokurorinë, Gjykatat dhe një pjesë të madhe të mediave në vend, Rilindja i ka kapur, ajo nuk mund t’i mbyllë gojën mediave ndërkombëtare, dhe e vetmja gjë që i mbetet për të mbrojtur pushtetin në rënie, është të çirret dhe akuzojë pafund këto media, që po e lëkundin nga themelet pushtetin e krimit dhe korrupsionit.
Në më pak se 24 orë, Rilindja përdori të gjithë arsenalin e saj, mediatik dhe gjithë burimet njerëzore që të akuzojnë dhe ta quajnë artikull të paguar atë të “Bild”, i cili e quante Ramën një “gangster” në krye të “shtetit të mafies”.
Gjuha e përdorur sot nga Rilindasit nuk është e panjohur, pasi me të njëjtat akuza, fyerje dhe shantazhe ka përdorur edhe ndaj mediave italiane dhe “Zërit të Amerikës”.
Në të gjitha rastet kemi të bëjmë me të njëjtën histori. Nga njëra anë kemi mediat ndërkombëtare të cilat prej kohësh shkruajnë për kriminalitetin në rritje në vendin tonë, dhe për forcën e krimit në pushtet, dhe nga krahu tjetër kemi Rilindasit e tërbuar të cilët duke i parë nga mënyra se si reagojnë janë të gatshme edhe të ‘vetëflijohen’ për të mbajtur me çdo kusht pushtetin.
Por mesa duket artikulli i “Bild” ju ka djegur edhe më shumë rilindësve pasi vjen menjëherë pas ‘dushit të ftohtë’ që ju bë Ramës në Samitin e Berlinit, dhe meqë Merkelit nuk ka çfarë t’i bëjë atëherë na ngelet alternativa B: “Hajde t’i biem samarit, kur s’kemi çfarë t’i bëjmë gomarit”.
Mesazhi i “Bild” ishte i qartë mes rreshtave, se arsyeja e vërtetë që Shqipërisë nuk i hapen dyert drejt Euopës janë, keqqeverisja, krimi në pushtet dhe korrupsioni që tashmë ndodhet në çdo qelizë të administratës.
Pikërisht kjo është dhe arsyeja se pse Rilindasit janë transformuar në ‘bisha të tërbuara’ dhe nuk po lënë gjë pa nxjerrë nga goja, pasi sot askush nuk i beson më atë shprehjen e famshme mafioze se: “Shqipëria ka nevojë për Europën, por edhe Europa ka nevojë për Shqipërinë”, sepse Europa nuk ka nevojë për krim, dhe korrupsion.
/Boldnews.al/
