Partizani ka siguruar titullin e 16-të kampion në historinë e tij 73-vjeçare. Ky sukses erdhi falë grupit të lojtarëve dhe punës së stafit teknik dhe drejtues. Disa nga protagonistët e skuadrës së kuqe mësohet se janë vënë në rreth nga klube të huaj, por shumica e tyre s’mund të largohen, pasi janë nën kontratë.
Ky edicion është konsideruar edhe si shansi final për disa lojtarë për të kaluar në skuadra të huaja, për vetë pjekurinë që kanë fituar. Njëri nga lojtarët e lakuar në merkatot e fundit për t’u transferuar jashtë vendit është Lorenc Trashi, i cili këtë vit po spikat si mbrojtës i majtë, ndonëse është mesfushor.
Merkatoja e verës është në prag dhe “Panorama Sport” ka mësuar nga burime të ndryshme pranë të kuqve se lojtari nga Gramshi është në radarin e disa klubeve kroate. Trashi ka kohë që po ndiqet nga skautë kroatë dhe largimi i tij nga Partizani mbetet në varësi të ofertës që do të mbërrijë. Thirrja në grumbullimin e fundit nga Kombëtarja shqiptare ia ka shtuar kreditet anësorit të majtë të Partizanit.
