Dy aeroplanë të vegjël, që po bartnin turistë nga e njëjta anije udhëtarësh, janë ndeshur mes vete në pjesën juglindore të Alaskas në Shtetet e Bashkuara, duke lënë të vdekur së paku katër njerëz. Dy persona tjerë janë shpallur të zhdukur.
Njëri aeroplan ishte duke transportuar 11 persona kur e goditi aeroplanin tjetër me pesë njerëz brenda tij. Aksidenti ndodhi afër qytetit Ketchikan, pranë kufirit me Kanadanë.
Dhjetë persona në njërin aeroplan mbijetuan dhe u dërguan në spital. Tri viktima ndodheshin në aeroplanin tjetër, ndërsa nuk dihet se në cilin aeroplan ka qenë viktima e katërt.
Aeroplanët e ndeshur ishin pjesë e anijes turistike “Royal Princess”, e cila ishte duke lundruar nga qyteti kanadez i Vancouverit drejt qytetit amerikan të Anchorages.
Aksidenti ndodhi rreth orës 21, 16 kilometra nga qyteti Ketchikan. Raportohet se në kohën e ndeshjes ka pasur erëra me shpejtësi prej 14 kilometrash në orë.
Anijet që ndodheshin afër vendit të aksidentit u përdorën si mjete ndihmëse për shërbimet federale të shpëtimit për të kryer kërkime për trupat e viktimave, shkruan “BBC”.
