Kryeministri Edi Rama ka njoftuar një konferencë për mediat në orën 13:00, ndërsa përmes një postimi në rrjet shkruan se është koha për dialog me të vetëpërjashtuarit nga zgjedhjet, duke nënkuptuar PD, LSI dhe aleatët e tyre në koalicionin opozitar.
“Në 13.00 me gazetarët, pas regjistrimit të kandidatëve tanë për 61 bashkitë dhe listave të këshilltarëve bashkiakë për mandatin e ri të qeverisjes vendore. Koha për fushatën zgjedhore të 30 qershorit dhe për vijimin e përpjekjeve për dialog me të vetëpërjashtuarit nga zgjedhjet”, shkruan Rama
Partia Socialiste ka zyrtarizuar dhe regjistruar 61 kandidatët e saj për kryebashkiakë në zgjedhjet lokale të 30 qershorit, ku duket se do të rivalizohet nga Bindja Demokratike e Astrit Patozit.
Një ditë më parë, një media që kontrollohet nga qeveria, shpërndau një draft-marrëveshje, me 7 pika, që u paraqit me burime të opozitës, por nga kjo e fundit u përgënjeshtrua. Me shumë gjasa drafti i paraqitur mund të përbëjë edhe platformën që ka Rama përballë propozimeve të opozitës për qeverinë tranzitore.
