Për dialog nuk kam nevojë për ndërkombëtarët, pasi e kam thënë se dialogu është rruga e vetme dhe e domosdoshme në një bashkëjetesë politike.
Kështu u shpreh Edi Rama, i pyetur nëse do të ishte i gatshëm për dialog me opozitën, me ndërhyrjen e ndërkombëtarëve.
Kryeministri tha se nuk ka nevojë as për gjermanë, finlandezë, amerikanë, italianë e çdokënd tjetër për të dialoguar.
“Unë jam i hapur, unë them kur do flasim, unë nuk vë kushte, i gatshëm për të folur për çdo gjë, por jo për të dalë unë mbi Kushtetutën e vendit”, tha ai.
Rama tha se zgjedhjet e 30 qershorit nuk mund të shtyhen asnjë ditë, duke shtuar se këto zgjedhje do të mbahen në ditën e dekretuar nga Presidenti.
“Është Kushtetuta e Shqipërisë që e përcakton këtë dhe unë nuk kam asnjë tagër për të shtyrë datën. Unë flas në emër të një shumice dhe ajo shumicë nuk negocion dot Kushtetutën dhe të drejtën e vet për të hyrë në një proces zgjedhor.
Do të shikoni shumë paketa këto ditë, paketa që prodhohen këtu për arsye të ndryshme, për t’u thënë kandidatëve që mund të regjistrohen si të pavarur që të kenë kujdes se ka një paketë. Me këto paketa po mbahen me gajret njerëzit që dalin e protestojnë”, tha Rama./BN/
