Përditësuar/ Protestuesit janë vendosur te Drejtoria e Policisë së Tiranës. Sipas intenerarit të protestës, ky është edhe stacioni i fundit i protestës-marshim.
Gazetari i Boldnews raportoi nga terreni se disa nga xhamat e godinës së DVPT janë thyer.
Gjithashtu, është hedhur molotov në kopshtin e godinës.
“Lironi vëllezërit tanë”, ishte një nga thirrjet e protestuesve.
***
Protestuesit te ministria
Protestuesit janë vendosur para gonisës së Ministrisë së Brendshme.
***
Policia thirrje protestuesve: Ka të plagosur, ndaloni “goditjet provokuese”
Policia e Shtetit u bën thirrje drejtuesve të protestës dhe protestuesve që të “ndalojnë goditjet provokuese ndaj policisë”.
Në një njoftim zyrtar, Policia shprehet se, “gjatë protestës së Partisë Demokratike përpara Drejtorisë së Përgjithshme të Policisë së Shtetit u hodh një numër i madh kapsollash të ndaluara. Si rezultat i këtyre goditjeve është lënduar një punonjës policie, i cili është dërguar në spital për trajtimin e nevojshëm. Policia e Shtetit u bën thirrje drejtuesve të protestës dhe protestuesve që të ndalojnë goditjet provokuese ndaj policisë”.
***
Muret e kryeministrisë ‘pushtohen’ nga mesazhet kundër Ramës
Janë të shumta mesazhet e qytetarëve që po shfaqen në muret e kryeministrisë. Ku sigurisht ato që spikasin më shumë janë ‘Rama ik’. Por, nuk mungojnë edhe mesazhet që kërkojnë arrestimin e disa rilindësve të akuzuar për drogë dhe korrupsion.
***
VIDEO/ Tensionohet situata, shashka dhe te flakadanë te parlamenti
Tensionohet situata te parlamenti. Një pjesë e protestuesve janë vendosur te parlamenti. Nga ana e tyre është hedhur shashka dhe janë ndezur flakadanë.
***
VIDEO-LIVE/ Protestuesit marshojnë drejt Drejtorisë së Policisë, Berisha i bashkohet protesës
Pas fjalës së kryetarit të PD-së Lulzim Basha, protestuesit kanë nisur marshimin drejt Drejtorisë së Policisë së Shtetit.
*Basha: Rruga drejt Europës është bllokuar nga përdhunuesi i zgjedhje
*Basha: Ja cili do të jetë fundi i betejës tonë
*Basha: Dhunës së Ramës do t’i përgjigjemi me …
*Basha: E vetmja zgjidhje që ofron Rama është dhuna
Ndërkohë, edhe ish-kryeministri Sali Berisha i është bashkuar protestës.
***
Protesta e opozitës, qytetarët mblidhen para kryeministrisë
Qytetarët të shumtë, me çadra në duar, kanë nisur marshimin drejt kryeministrisë për protestën e sotme të thirrur nga opozita.
Ish-deputetë të PD-së kanë paralajmëruar se protesta e sotme do të jetë ndryshe nga ato paraardhëse. Protesta është planifikuar të zhvillohet në formën e një marshimi.
Itinerari i marshimit të mundshëm protestës së thirrur nga opozita: Sheshi Skënderbej – Kryeministria – Drejtoria e Përgjithshme e Policisë – Parlament – Ministria e Brendshme – Drejtoria e Policisë Tiranë.
“Simbolika e këtij marshimi proteste janë institucionet e kapura nga krimi- Parlamenti dhe Qeveria, si dhe institucionet që janë vegla të dhunës barbare policore mbi qytetarët dhe liritë e të drejta e tyre”, thanë burime nga opozita.
Opozita zhvillon pasditen e sotme protestën e gjashtë kombëtare, duke kërkuar largimin e kryeministrit Edi Rama dhe krijimin e një qeverie tranzitore si kusht të panegociueshëm për zgjedhje të lira e të ndershme.
