Një ditë më parë, në një konferencë për mediat, kryeministri Edi Rama shprehu gadishmërinë për të dialoguar me opozitën. Sot përmes rrjeteve sociale i drejtohej kreut të opozitës me shprehjen tashmë të njohur të tij “Kur do flasim”.
Duket se sinjalet në drejtim të opozitës, për diversion apo si hapin e parë të një tërheqjeje ose matje pulsi, Rama ka zgjedhur t´i përmbyllë përmes Ben Blushit.
Më saktë Top Channel, kanalit që sot drejtohet nga Blushi, pak kohë më parë një kundërshtar i Ramës brenda PS-së, dhe sot duket se është rikthyer në pozicionin fillestar, shërbyes në distancë i tij.
TCH i Blushit duke ju referuar ‘bijës së vet’ Gazetës Shqip, paraqiti një draft, që e luan si propozim të opozitës, por që duket se është shkruar në një nga zyrat në Bulevardin Dëshmorët e Kombit, ndoshta atje ku mblidhen mijëra qytetarë që kërkojnë dorëheqjen e Ramës, prej 16 shkurtit 2019.
Pasi opozita paraqiti propozimin e saj për qeverinë tranzitore, dhe sot një aleat i Lulzim Bashës, artikuloi disa emra socialistësh, jo Rilindasish, që mund të jenë në përbërje të kësaj qeverie, duke dhënë kështu dakordësinë e opozitës për to, Rama përmes Blushit hodhi në publik një draft-marrëveshje.
Ndoshta si kundrapeshë ndaj propozimit të opozitës për qeverinë tranzitore, drafti i përhapur nga Beni, përmban 7 pika, 3 më pak se ai që ka publikuar Basha pak javë më parë.
Mes atyre 7 pikave, duket se Rama përmes një televizioni që kontrollon pothuajse tërësisht në vijën editorial, në të paktën 4 pika të asaj që e quan draft marrëveshje, ai merr angazhime për tu plotësuar.
Së pari pranon zgjedhjet e parakohshme, por nuk pranon të ikë nga posti i kryeministrit, një kusht i panegociueshëm nga opozita.
Së dyti premton ngritjen e Gjykatës Kushtetuese brenda 30 ditësh, edhe ky një kërkesë e vazhdueshme e opozitës, në kushtet kur kjo gjykatë është e vetmja që mund të interpretojë kushtetutshmërinë e vendimeve qeveritare.
Së treti premton krijimin e një qeverie zgjedhore, e cila gjithashtu kërkohet nga opozita, por me termin qeveri tranzitore.
Së katërti, zgjedhjen e Prokurorit të ri të Përgjithshëm, nga një Parlament legjitim.
Duket se me këto 4 pika, nga 7 që ka draft-marrëveshja e hedhur në qarkullim, Rama po kërkon përmes Blushit të ulet në një dialog me opozitën.
Ndoshta ka kuptuar që topi është në fushën e tij…
