Opozita do të protestojë sot në orën 11:00 para Drejtorisë së Policisë së Tiranës, për të kërkuar lirimin e qytetarëve që janë ndaluar nga policia, gjatë dhe pas protestës së djeshme.
Megjithëse nuk ka një të dhënë zyrtare, mendohet se mbi 50 qytetarë janë ndaluar dhe mbahen në mjediset e komisariateve dhe drejtorisë së policisë së Tiranës.
Mes të ndaluarve ishte edhe Sekretari Organizativ i PD-së, Sait Dollapi, mbi të cilin u ushtrua dhunë nga forcat e FNSH.
Dollapi i transportua në orët e vona të natës në spitalin e Traumës për të marrë mjekimet e nevojshme.
Ndërkohë, drejtues të opozitës, grupi parlamentar i PD-së dhe kryesia e kësaj partie, në orët e para të ditës së sotme, vendosën organizimin e një proteste para Drejtorisë së Policisë së Tiranës.
Lulzim Basha, kryetar i PD-së, i ka drejtuar një thirrje qytetarëve të Tiranës që t’i bashkohen protestës.
Nuk dihet se sa mund të zgjasë kjo protestë, por ajo që dihet është se do të kërkohet lirimi i qytetarëve të ndaluar nga policia, dhe ndalimi i policëve që ushtruan dhunë ndaj protestuesve.
Mbremjen e djeshme zona rreth Drejtorisë së Tiranës i ngjante një zone lufte, ku nuk munguan përplasjet mes protestuesve që qëllonin me kapsolla dhe policisë që hidhte gaz dhe ujë me presion.
Edhe në këtë zonë pati raste të dhunës ndaj qytetarëve dhe kërcënime dhe agresione ndaj ish-deputetëve.
