Disa qindra qytetarë kanë nisur një protestë para Drejtorisë së Policisë së Tiranës, duke iu përgjigjur thirrjes së opozitës.
Ervin Salianji, ish-deputet i PD-së, tha se të gjitha protestat e opozitës kanë qenë demokratike, përfshi edhe atë të zhvilluar dje.
“Protestat, me afrimin e ditës së zgjedhjeve do të radikalizohen, pasi ne nuk mund të lejojmë që në vitin 2019, në Shqipëri të instalohet diktatura”, tha Salianji.
Në protestë ndodhen ish-deputetët e opozitës dhe anëtarët e Këshillit Kombëtar të PD-së, si dhe disa qindra qytetarë të Tiranës.
Ndërkohë që përmes një postimi në faqen zyrtare të Partisë Demokratike në rrjetet sociale thuhet “beteja që ka nisur është pa kthim. Historia do tregojë se kjo betejë do të përfundojë me shporrjen e qeverisë së krimit dhe triumfin e vlerave europiane. E ardhmja e shqiptarëve është Europa!”.
