Albana Vokshi, ish-deputete e PD-së, ka bërë thirrje për rrëzimin e Edi Ramës me çdo mjet dhe me çdo kosto.
E pranishme në protestën e banorëve të Unazës së Re, Vokshi, tha se provokimi që bëri Edi Rama, duke urdhëruar dhunimin e 4 grave, banore të Unazës së Re, si dhe arrestimin e disa të tjerëve, është një provokim edhe ndaj Partisë Demokratike.
“Ju ftoj që të gjithë të protestojmë pa pushim derisa të rrëzojmë Edi Ramën. Atë e pret fundi, sa më shumë të zgjasë ditët në pushtet, aq më i tmerrshëm do të jetë fundi i tij”, tha Vokshi.
Banorët e Unazës së Re do të marshojnë nga vendi ku zakonisht protestojnë prej muajsh drejt Drejtorisë së Policisë së Tiranës, ku mbahen të arrestuarit e një ditë më parë, mes të cilëve edhe ish-deputeti Klevis Balliu.
