Nga Boldnews.al
Kapje…! Termi që kryeministri Edi Rama e ka qëllim në vetvete. I do të gjitha, pushtetin e tij absolut, kontrollin mbi partinë, mbi Parlamentin, e padyshim mbi qeverinë. Për të, këto nuk mjaftonin, donte edhe më shumë zgjerim, për ta kthyer vendin në një pikturë të tij ku të ngjyrosë e zhgaravisë sipas “muzës” së momentit.
Gjykatën Kushtetuese e asgjësoi, Gjykatën e Lartë gjithashtu, të tjerat me një “fërshëllimë” i ve në rresht. Prokurorinë e ka si një nga zyrat e tij të varësisë. Që nga dhjetori i vitit 2017, me 69 vota të dala nga oazi i Rilindjes, vendosi në krye të institucionit të akuzës Arta Markun.
As edhe një partiake e tij nuk do ishte kaq e zellshme sa Marku. Është aty për të mbyllur dsoje dhe kurrë për t’i hapur. Shifrat e tregojnë, ata të vrasin kur i lexon, por është çlirim për Ramën. Vetëm nëntë çështje penale të hapura për akuzën e korrupsionit të zyrtarëve të lartë publik, të emëruar ose të zgjedhur, janë regjistruar në prokurori për vitin 2018. Kaq është korrupsion? Vetëm nëntë njerëz e kanë bërë, edhe ata zyrtarucë të nivelit të fundit në hierarkinë e lartë?
Opozita çiret e klith për dosjen 339 dhe 184, që i janë zverdhur fletët në Prokurorinë e Krimeve të Rënda, pasi askush nuk e zë me dorë. Aty fshihet një pjesë e dyshimit për shitblerjen e votave dhe lidhjet e politikanë të nivelit të lartë të Rilindjes me elementë të botës së krimit, kryesisht të “specializuar” në trafikun e drogës. Deri tani në përgjime kanë dalë Vangjush Dako dhe dyshohet edhe Damian Gjiknuri. Por që të dy shijojnë lirinë, ende me shumë pushtet, e mbi të gjitha Damiani përulet para gurusë indian për të “pastruar” shpirtin.
Shërbimi Informativ Shtetëror gjithashtu është në duart e kreut të qeverisë, sindikatat i ka vënë në rresht duke ua mbyllur gojën ende pa nxjerrë zë. Shoqërinë civile e ka joshur me të mira materiale dhe janë piaristet më të zëshme të pushtetit. Por batërdia vijon me mediat. Televizionet kombëtare ja kalojnë edhe ERTV-së së Ramës për kronikat dhe emisionet televizive në favor të pushtetit. Media e mbetur, që vijon të bëjë një lloj qëndrese siç janë portalet, kërcënohen çdo ditë nga forca e pushtetit.
E në delirin e kapjes, sytë i ka kthyer tek qytetarët. Edhe ata kërkon ti fusë në vathën e tij, në mos me bindje me dhunë. Vendin kërkon ta kthejë në një shoqëri me mendje të shpëlarë nga propaganda, që ti përulen “udheheqësit Rama”, si të ishte një i dërguar nga lart dhe jo një vijimësi e diktaturës, në gen e në sjellje.
Kush nuk i bindet e kërcënon me burg, kush proteston i bën terror me strukturat policore. Edhe sa do zgjasë kapja. Në duar ka terrorin por frymën popullore, tashmë e lodhur prej qeverisjes arrogante nuk ka qeli që e mban mbyllur. Rama beson se edhe qytetarët do i kapë. A do ia arrijë vallë?
