Derbi i kryeqytetit është një sfidë mjaft e nxehtë, dhe pritet me interes. Partizani nga njëra anë, kërkon fitoren që i jep zyrtarisht fitimin e titullit, ndërsa nga ana tjetër, Tirana në “ujërat” e mbijetesës, pikët i ka jetike.
Përveç situatës në kampionat, gjithsesi derbi mbetet derbi, dhe një nivel mbi ndeshjet e tjera. FSHF pati vendosur që edhe këtë javë, deri në fund, të kampionatit, të katra ndeshjet të luhen në një orar.
Derbi qe vendosur që të luhet ditën e dielë, më 12 maj, në orën 16:30, ashtu si të gjitha ndeshjet e tjera. Por, të dyja klubet, si të kuqtë, edhe bardheblutë kanë bërë një kërkesë për ndryshimin e orarit.
Kryeqytetaset kanë kërkuar që të shtyhet ndeshja për ditën e dielë, në orën 19:00. Ky është një opsion, ndërkohë që opsion tjetër është edhe që ndeshja të luhet ditën e hënë, e veçuar nga të tjerat, po në orën 19:00.
Tashmë, “topi” mbetet në fushën e FSHF, nëse do e pranojë këtë kërkesë të klubeve apo jo.
