Jasir Asani është një nga lojtarët më të mirë të Partizanit, që po shkon drejt titullit kampion, por edhe Kategorisë Superiore. 23-vjeçari po përjeton sezonin më të mirë në karrierën e tij, ndonëse shijen e titullit e ka provuar edhe me Vardarin në Maqedoni.
Për sulmuesin e të kuqve është thënë se ndodhet nën vëzhgim nga Kombëtarja shqiptare, gjë të cilën e ka pohuar para disa muajsh zv.trajneri i kuqezinjve, Ervin Bulku. Por Partizani dhe Kombëtarja mund ta humbasin këtë element të spikatur. Sinjali ka ardhur së fundmi nga menaxheri i lojtarit, Aleksandar Jovkov.
Kohë më parë Asani u pajis me pasaportë shqiptare dhe me fanellën kuqezi ka luajtur një ndeshje miqësore me Kombëtaren U-21, që asokohe drejtohej nga trajneri Redi Jupi. Sulmuesi më pas ka deklaruar se gjithnjë e ka pasur ëndërr të luajë me Kombëtaren shqiptare dhe nuk ndihej i penduar pse nuk ka zgjedhur Maqedoninë.
Me anë të një postimi në rrjetet sociale, menaxheri i Asanit i ka bërë një kërkesë trajnerit të kombëtares së Maqedonisë së Veriut, Igor Angelovski, që të thërrasë Jasirin, i cili po shkëlqen te Partizani. Mirëpo, në komentet e mëtejshme Aleksandar Jovkov ka hyrë në një debat, ku disa persona i kujtojnë atij që Asani la Maqedoninë me dëshirë për Shqipërinë dhe pse duhet thirrur?
Një tjetër komentues i thotë menaxherit që t’i gjejë një ekip të madh lojtarit, në mënyrë që edhe ai të përfitojë më shumë. Me përgjigjet e tij, Jovkov lë të kuptojë divorcin e shpejtë të Jasir Asanit me Shqipërinë dhe Partizanin, pasi në verë pritet ta sistemojë në një klub tjetër.
