Në editorialin e numrit të fundit të Tirana Times, gazetë e Institutit të Studimeve Ndërkombëtare, që botohet në anglisht dhe ka si audiencë trupin diplomatik dhe të huajt që jetojnë në Shqipëri, janë pikërisht përfaqësuesit e ambasadave që marrin një kritikë të fortë.
“Ka patur një lëvizje kureshtare, por që nuk ndihmon, të vëmendjes së trupit diplomatik në Tiranë, drejt travellologjisë (travelogy) një mënyre të vepruari që ka të bëjë me të përjetuarit, provuarit, përshkruarit dhe të promovuarit e panoramikes, kulturores, kulinares, dhe kënaqësive që rrjedhin prej tyre, të një vendi, me fokus te ekzotikja”, shkruan Tirana Times.
Gazeta, bordi editorial i së cilës përbëhet nga ekspertë të mardhënieve ndërkombëtare, e fokuson editorialin e radhës te Samiti i Berlinit, dhe thekson se qeveria duhet t’i gjejë gabimet te vetja dhe jo te vendet antare të BE. Në këtë ‘amnezi’ të qeverisë ndikojnë edhe ambasadorët në Tiranë të cilët, sipas editorialit, kanë kaluar në travellologji, duke shpërfillur problemet strukturore të vërteta dhe krizën akute që shpaloset çdo ditë në Shqipëri.
Po aty citohet studiuesi Ivan Krastev sipas të cilit ‘një shtet i dobët në krizë është i madh sa një elefant’, por kur vendos t’i mbyllësh sytë, nuk mund ta shohësh më, pavarësisht përmasës.
Politiko.al
