Një makinë tip Ford është përfshirë nga flakët gjatë natës në Elbasan. Paraprakisht dyshohet për zjarrvënie të qëllimshme. Ngjarja ka ndodhur në lagjen“5 Maj”, ndërsa sipas burimeve nga automjetit i është vënë zjarri, teksa ishte i parkuar në oborrin e banesës.
Burime bëjnë me dije se makina i përket kryetarit të PS-së Elbasan, Xhevahir Budani. Ai aktualisht mban edhe postin e drejtorit të Operatorit të Shërbimeve të Kujdesit Shëndetësor për Qarqet e Elbasanit, Korçës dhe Beratit.
Ngjarja ka ndodhur rreth orës 02:30, ndërsa ende nuk ka informacione zyrtare nga policia e Elbasanit.
Duhet thënë që z.Budani ditën e djeshme ka festuar ditëlindjen e tij të 48-të. Vetë kreu i PS-së është shprehur se nuk ka konflikte me njeri ndërkohë që grupi hetimor po punon për zbardhjen e plotë të ngjarjes, idetifikimin dhe kapjen e autorëve.
Njoftimi i Policisë:
Gjatë natës në lagjen ” 5 Maji” në Elbasan, ka rënë zjarr dhe është djegur pjesërisht mjeti në pronësi të shtetasit Xh.B., i cili ishte i parkuar në rrugë pranë banesës.
Nga hetime paraprake dyshohet se zjarri është i qëllimshëm, grupi hetimor po punon për zbardhjen e plotë të ngjarjes, idetifikimin dhe kapjen e autorëve.
