Në stadium, veç presidentëve Refik Halili e Ardian Takaj, të pranishëm ishin edhe Lufti Nuriu dhe Arlind Broshku, zëvendëspresidenti i skuadrës korçare dhe Gerhard Takaj. Në tribunë ishin lojtarët e dëmtuar: Erando Karabeci, Dorian Kërçiku, Marko Radas dhe Bruno Dita.
Ashtu si tribuna VIP, edhe ajo e gazetarëve ka qenë e tejmbushur nga të pranishmit, ndonëse njerëz të medias ka pasur me kokrra. Shumica e njerëzve ishin tifozë të të dyja ekipeve. Për rreth 11 minuta Tirana luajti me 10 futbollistë, pasi Oduamadi u dëmtua në fushë, ndërsa Mema i kishte përfunduar zëvendësimet dhe nuk mund të hidhte askënd në fushën e lojës.
Lojtari nigerian la lojën dhe u drejtua në dhomat e zhveshjes pa pyetur askënd. Interesant në pjesën e parë ishte një goditje e Goxhës që i bie topit me forcë, por sfera përplaset në fytyrën e Allës, që qëndron stoik në këmbë.
(Tifozët gjermanë në “Selman Stërmasi”)
Si në çdo takim pa tifozë, ata që mbizotërojnë në fushë janë trajnerët dhe batutat e tyre me lojtarët. E nis si fillim Ardian Mema, që kapet menjëherë me Mavejen. “Toni, Toni”. Më pas e ka me Dajën: “O Oni” dhe kthehet duke i thënë stafit: “Ky i bën presing sipër, në vend të rrijë në krah”. Sentamu, një nga më të dobëtit në fushë, pas ndeshjes thotë: “Ej Jonuz, kros…” Më pas, duke e parë që lojtari nuk e dëgjon, i drejtohet pankinës. “Pse shkon atje, nuk e di”. Një këshillë edhe për Grent Halilin, që tërhiqet shumë në mesfushë. “O Grento ik atje, jo këtu, më dëgjo mua”.
Gjithsesi, batutat mes Memës dhe lojtarëve i ndal një tifoz nga tribuna VIP, që e ka me Oduamadin. “Ardo, ndërrohe atë”, fjali që solli të qeshura në stadium, ndërsa një tjetër e ka me Sentamunë. “O Jonuz, lidh lidhëset mor m..”. Batutat i mbyll Eni Imami me fjalët inkurajuese: “Hajde edhe pak, edhe pak”. Në krahun tjetër, Shehi në fillim ka qenë i përmbajtur, por më pas është çakorduar. “Pas shpejt, pas” ose “Sibo, Sibo, o Leo”. Tensioni rritet dhe Shehi përplas me forcë bidonin e ujit në tokë, pas një pasi të gabuar të Krasniqit.
Nga ana tjetër, lojtarët e Skënderbeut janë më autoritarë në fushë. Si fillim i drejtohet Allës: “Dora o”, duke kërkuar një faull në mesfushë, por gjyqtari e ledhaton nga shpatullat. Më pas Gjergji e ka me Gripshin: “Futu mo, futu”. Vangjeli, si kapiteni i skuadrës, e ka me të gjithë. Si fillim i ulëret Sambosë për pasim të padhënë, ndërsa më pas i kërkon llogari gjyqtarit. “Ik ore”./PANORAMASPORT.AL
