Kryetari i KLP-së, Gent Ibrahimi, thotë se brenda 45 ditëve, mund të kemi Prokurorin e ri të Përgjithshëm, ndonëse afati i procesit është i shkurtër.
“Persa i përket afateve kohore, 45 ditë është pak. Asnjë Prokuror apo gjyqtar i Republikës së Shqipërisë nuk ka kaluar përmes procedurës së vettingut për 45 ditë, por ky tashmë është një afat ligjor.
Në këto kushte, të gjitha institucionet e shtetit duhet të përshtaten. Në momentin që i drejtohemi organeve të vettingut, ata duhet të përshtaten se s’bën, dhe të zbatojnë afatet në 45 ditë.
Patjetër që një nga këto 4 kandidatura do të jetë Prokurori i Përgjithshëm”, u shpreh i bindur kreu i KLP-së, i ftuar në emisionin Top Talk.
Më pas Ibrahimi foli edhe për kandidaturën e zotit Çela, i cili ende nuk e ka kaluar procesin e vettingut.
“Olsion Çela do të jetë kandidat vetëm nëse e shpallim ne zyrtarisht. Brenda javës tjetër do shpallim 3 kandidaturat për Prokuror të Përgjithshëm. Fillimisht ata do i nënshtrohen një vlerësimi paraprak.
Kandidatët do të zgjidhen në saj të pikëve që do grumbullojnë nga ana e Këshillit. Çdo kriter do vlerësohet me pikë, duke u mbështetur në disa drejtime”, argumentoi Ibrahimi.
