Në Ditën Botërore të Lirisë së Shtypit, në ambientet e Pallatit të Kulturës në Bajram Curri, Bashkia Tropojë, me në krye Besnik Dushaj, nderoi me titullin “Qytetar Nderi” i Tropojës drejtuesin e “Zërit të Amerikës” për Euro-Azinë, Dr.Elez Biberaj, me motivacionin:
“Për kontribut jetësor si misionar i së vërtetës, i cili nëpërmjet valëve të ‘Zërit të Amerikës’ mbajti gjallë shpresat e shqiptarëve për liri kur ata ishin nën diktaturën komuniste, i frymëzoi dhe i bashkoi ata rreth vlerave të demokracisë, respektit për të drejtat e njeriut dhe shtetin ligjor, duke e kthyer ‘Zërin e Amerikës’ në burimin më të kërkuar dhe më të besueshëm të lajmeve në të gjithë hapësirën shqiptare në Ballkan.”
Gjatë fjalës së tij kryetari i Bashkisë së Tropojës është shprehur tejet i nderuar për këtë tillull që po i jep Biberaj.
Gjatë një historiku të gjatë për jetën e Elez Biberaj Dushaj ka treguar prejardhjen e tij, familjen, fëmijërinë, gjithë jetën deri në ditët e sotme që Biberaj është drejtuesi i VOA për Euro-Azinë.
“Emblema e gazetarisë së një vendi të lirë, studjuesi dhe historiani, botuesi i disa librave me vlera të mëdha për zhvillimet në Shqipëri e Kosovë, simboli dhe idhulli i gazetarëve dhe dëgjuesve shqiptarë në trojet e tyre në Ballkan e diasporë, bashkëqytetari ynë i madh dhe sot nderi i Tropojës, me punën e tij të jashtëzakonshme, me virtytet e rralla të malësorëve, me fisnikërinë të trashëguar ndër breza, arriti në mbi 30 vjet, shkallët më të larta të medias më të madhe e të fuqishme në botë, nga gazetar deri tek drejtor për Europën dhe tash për Euro Azinë”, tha Dushaj.
Ndërsa ka marrë fjalën në ceremoni, gazetari Biberaj tha se Zëri i Amerikës është kampion i shtypit të lire.
“Zëri i Amerikës vazhdimisht ka praktikuar një gazetari të një niveli të lartë në mbështetje të lirisë dhe demokracisë. Media e lirë dhe e pavarur është kurora e artë e një rendi demokratik.
Brenda disa ditësh, pikërisht më 13 maj 2019, Zëri i Amerikës do të shënojë 76 vjetorin e transmetimit të parë në gjuhën shqipe. Gjatë gjithë këtyre viteve, Zëri i Amerikës ka qenë bashkëudhëtar me shqiptarët, duke iu dhenë shpresë gjatë kohëve më të vështira dhe duke mbeshtetur përpjekjet për të realizuar potencialin e tyre të plotë demokratik.
Angazhimi tek Zëri i Amerikës nuk ka qenë thjesht një punë për mua, por ka qenë mbi të gjitha një mision. Tek Zëri i Amerikës kam gjetur pasionin tim në jetë. Jam krenar që nëpërmjet Zërit të Amerikës mu ka dhënë mundësia të luaj një rol modest në përcjelljën e parimeve dhe idealeve demokratike amerikane tek shqiptarët kudo që ata janë.
Është më rëndesi që sot, në Diten Ndërkombëtare të Shtypit, të kujtojmë se media e lirë dhe e vërteta janë armë të fuqishme në shërbim të lirisë, paqes dhe demokracisë.
Shqiptarët kanë bërë shumë sakrifica në rrugën drejt lirisë dhe demokracisë.
Jam i lumtur që Shtetet e Bashkuara dhe populli amerikan kanë qëndruar përkrah jush në këtë përiudhë historike dhe kanë mbeshtetur me force përpjekjet tuaja për t’u ankoruar qartësisht në familjen e vendeve dhe shoqerive demokratike perëndimore”, tha Biberaj.
