Kërcënimi me burg i Ramës nuk tremb më askënd

Nga Boldnews.al

Tetor 2013, Rama e nisi punën si kryeministër me fjalën “burg”… “Kam qëllim të bëj shtet, jo të mbaj pushtet”, qe deklarata e Ramës. E në këtë histerizëm e suficit të pamasë të fjalës burg, e pësuan qytetarët shqiptarë, kushdo që nuk kishte paguar energjinë dhe tentoi rilidhjen e saj, përfundoi në qeli.

Operacioni i madh mori jetë njerëzish. Një i dënuar se nuk kishte paguar 30 mijë lekë të vjetra të energjisë hodhi litarin rreth qafës dhe i dha fund jetës. Punë e madhe, një njeri më pak për kryeministrin…, “do bëj shtet”, theksonte ai. Por ndërsa shtrëngonte gjithnjë e më shumë lakun në fytin e qytetarëve pa përkrahje, pushtetarët, bizneset e lidhur me politikën dhe krimi që zgjaste dorën në bashkëjetesë me qeverisjen, nuk e njohu kurrë fjalën burg.

Kemi qytetarë të dënuar për rilidhje të paligjshme të energjisë, por nuk kemi në qeli asnjë zyrtar të lartë të OSHEE-së që ka abuzuar me miliona euro.

Kanë provuar qelitë edhe fshatarët që ndërtuan një çati të shtëpisë së rrënuar, por nuk ka në burg asnjë zyrtar bashkie që ka rrënuar objektet kulturore dhe dhënë leje për pallate e kulla.

LEXO EDHE  E rëndë në Kavajë/ Foshnja dërgohet i pajetë në spital

“Domosdoshmëria për një përgjigje të prerë ligjore mbi dhunën ndaj të zgjedhurve dhe funksionarëve, që nga salla e parlamentit deri në çdo metër katrorë të Shqipërisë, dhunën ndaj punonjësve të policisë që nga kundërshtimi me forcë deri tek prekja me gishtin e vogël të uniformës blu”, tha Rama, duke premtuar ndëshkim me burg. Plot 12 herë përmendi fjalën “burg” në një fjalim jo shumë të gjatë.

E sot Rama që pretendon se do dënojë me burg këdo që bllokon rrugët nuk kërcënon asnjë. Nuk frikohet kush. Qytetarët “burgun” e kanë të përditshëm, vuajnë më shumë se të jenë në qeli. Ndoshta në burgjet e Rilindjes, mund të “jetojnë më mirë”, për shkak të ca bosëve të krimit që i kanë kthyer qelitë në “hotele luksi”, ku nuk u mungon asgjë.
Në pragun e vendosjes së regjimit autoritar Rama i frikësohet idesë që qytetarët nuk kanë më frikë. Sado të përmendë e kërcënojë me fjalën burg, regjimet kanë gjithnjë një fund, aq sa për politikanët autoritarë fjala burg do ishte lule në momentin që bien nga pushteti.