Duelet e sotme gjysmëfinale të Ligës së Europës kanë parë gola dhe spektakël, por kanë lënë gjithçka të hapur sa u përket sfidave të kthimit, edhe pse dy skuadrat angleze duken të avantazhuara për një përballje mes tyre në finale.
Eintraht Frankfurt-Çelsi 1-1
Frankfurt dhe Chelsesa kanë barazuar 1-1 në gjysmëfinalen e parë të Europa League të zhvilluar në Commerzbank-Arena. Kjo ishte gjysmëfinalja e nëntë e The Blues që kur Roman Abramovic bleu klubin në vitin 2003, asnjë skuadër nuk ka luajtur në më shumë gjysmëfinale (Barcelona gjithashtu ka nëntë). Ishte sulmuesi më i kërkuar i momentit Luka Jovic ai që ka shënuar golin e avantazhit për vendasit në minutën e 23’ të takimit. Kur dukej sikur miqtë do të hynin të zhgënjyer në dhomat e zhveshjes, Pedro ka barazuar rezultatin pak sekonda përpara pushimit. Sulmuesi spanjoll ka shënuar 4 gola dhe ka përgatitur 3 të tjerë në gjashtë ndeshjet e fundit të Europa League.
Në pjesën e dytë, mundësitë për të shënuar golin e avantazhit ishin për Chelsea-n, por lojtarët e Sarri-t kanë shpërdoruar shumë. Në fund, anglezët duhet të kënaqen me një barazim në Gjermani dhe do të mundohen të marrin një fitore në Stamford Bridge.
Arsenal-Valencia 3-1
Arsenal ka fituar 3-1 me përmbysje gjysmëfinalen e parë të Europa League kundër Valencia-s, të luajtur në “Emirates Stadium”. Kanë qenë miqtë që kanë kaluar në avantazh në minutën e 11-të falë një goditje me kokë të Diakhaby. Bëhet fjalë për një realizim të rrallë, duke parë se Arsenal nuk pësonte gol prej 460 minutash në ndeshjet e Europa League të luajtura në shtëpi në këtë sezon (që nga ndeshja e fazës me grupe kundër Vorskla Poltava).Gjithsesi, festa e miqve nuk ka zgjatur shumë, sepse Lacazette ka përmbysur rezultatin në tetë minuta.
Sulmuesi i “Topçinjve” ka barazuar në minutën e 18-të, duke finalizuar në mënyrën e duhur një kundërsulm të shpejtë, dhe ka shënuar të dytin në të 26-ën me një goditje me kokë pas asistit të saktë të Granit Xhakës.
Francezi është bërë lojtari i tretë i “Topçinjve” që shënon dy gola në një gjysmëfinale europiane pas Charlie George (Kupa e Panaireve 1970) dhe Steve Bould (Kupa e Kupave 1995). Në minutën e 91-të, Aubameyang ka realizuar edhe golin e tretë të takimit, duke i dhënë një avantazh të rëndësishëm skuadrës së Unai Emery për ndeshjen e kthimit, ku do të vendoset edhe se kush do të shkojë në finale.Valencia do të presë Arsenal-in 9 majin e ardhshëm.
