Nga Boldnews.al
Ai vjen nga radhët e qeverisë dhe ka një alkimi të veçantë me kryeministrin Edi Rama. Nuk i lidh vetëm Rilindja, por edhe bota shpirtërore, në mes të së cilës është bashkëjetuesja e përhershme në politikën e majtë, idealet…, lidhjet me shoqninë civile, “civilizimin” poligamik, etj, etj. Çfarë e ka Rama Bledi Çuçin? Përgjigjet mund të jenë të shumta, por e dukshmja është se Çuçi u përzgjodh nga Kryerilindasi si ministër i Bujqësisë dhe Ushqimit.
Nuk është i vetmi që mban detyra të larta. Në diplomaci përfaqësohemi nga një njeri i ditur, Gent Cakaj quhet. Ka karrierë të gjatë, është 28 vjeç. Kohët e fundit e kemi zbuluar “eruditin”, që në fushën e tij diplomatike është si “Ajshtajni” në fizikë. Aq shumë njohuri ka, sa i ngjan një ardisku të tejbushur dhe kur nis të flasë, çorientohet nga interferimet e shumta që i vijnë, kryesisht nga leximi.
Thonë njerëz pranë tij se Cakaj nuk i mat librat me tituj (numër), por me metër kub. Aq i “ditur” është sa nis të recitojë poezi nga Naim Frashëri, ngatërrohet me Franc Kafkën dhe e lidh me Ismail Kadarenë. Ai librat i “ha”, jo i lexon. Megjithatë e ngrëna është fusha e Çuçit. Ai i di mirë këto punë.
Punët i shkojnë “vaj” në bujqësi… Vaji i palmës hahet apo edhe pihet? Përgjigjen e jep po ministri i Bujqësisë me përvojë të madhe në shijet e kuzhinës Bledi Çuçi.
“Përdorimi i vajit të palmës nuk është i paligjshëm. Mund të bësh analizën e bulmetit dhe nëse të del me 30% me vaj palme dhe kur nuk është shënuar, atëherë këtu kemi të bëjmë me shkelje. Vaji palmës nuk është cianur. Vaji i palmës përdoret në Europë dhe nuk të bën keq. Po të hash gjalp nga lopët zvicerane, vdes se është yndyrë e rëndë”, u shpreh ministri Çuçi.
Deklarata e tij shërbeu për meme të shumta, por në fund diçka mbeti. Lopët zvicerane mund të kenë refuzuar “barin” në shenjë proteste, ndërsa grosistët e vajit të palmës, ku e gjithë bota e mban nën kontroll për të mos e tepruar në ushqime, janë më të gëzuarit nga fjalët e ministrit tonë. Ende nuk i ka dhënë përgjigje pyetjes nëse vaji i palmës përdoret edhe për “lubrifikim”…?!
Po mirë që ka “eksperte” në atë ministri që ia tregojnë të vërtetën. Njëra prej tyre është nënministrja e Çuçit, Ermira Gjeci.“Nëse përdorim allçi në djath, atëherë djathi nuk do të pritej dot”, deklaroi ajo, ndërsa shtoi se: “është ndryshe niseshte dhe ndryshe allçi”.
E çfarë rëndësie kanë këto në fund të fundit, qytetarët shqiptarë, përfshi edhe Rilindas do i konsumojnë këto produkte ushqimore edhe me materiale ndërtimi. Mjafton mos ketë hekur e çimento dhe këtu ka një lloj sigurie, pasi dy materialet e fundit janë ekskluzivitet i Lali Erit dhe Çuçi aty nuk të prish pazarin…
“Çfarë të korrësh do të mbjellësh”, tha zëvendësministrja e Arsimit Lorena Haxhiu. Edhe ajo është e re, por botëhapur. Kriteri që e solli në atë detyrë të rëndësishme ishte një foto me bikini, buzë detit. Kryeministri ynë, si një qëmtues i jashtëzakonshëm i rrjeteve sociale, deri në manijakëri në këtë fushë, e pikasi që nga ai moment dhe nuk hezitoi të hedhë firmën për ta bërë numrin dy të ministrisë që na arsimon.
“O Zot sa të pazotë që janë”-, do ketë menduar menduar Elisa Spiropali, e ‘mbersuar’ nga gafat e ministrave dhe zëvendësminisreve të tjerë të Ramës, ajo është si “qershiza” mbi tortë e kabinetit. Mirë që gjendet Elisa aty për të shpëtuar “nderin” e kryeministrit për përzgjedhjet që ka bërë. Sa mirë ajo e trajtoi rastin e tmerrshëm të përdhunimit të 13-vjeçares nga Kavaja?
“Raste të tilla fatkeqësisht ndodhin dhe në vende të zhvilluara, bëhen edhe filma për raste të tilla të tmerrshme”-shkruajti Spiropali. E më vonë ajo ia zbuloi identitetin e plotë viktimës së abuzuar, ndonëse media “kazan” e dinte prej kohësh, por ruajti etikën.
Iku shpejt kjo ngjarje, Spiropali me ca mastera jashtë, (por jo sa Gent Cakaj që për një vit bëri tre), u mahnit aq shumë sa “Don Kishotin” e konsideroi personazh të letërsisë shqiptare, Timo Fllokon e ngatërroi me Çerçiz Topullin, e mbi të gjitha Skënderbeun me Edi Ramën. Për këto të tjerat mund të jetë penduar, ama që Rama është si Skëndërbeu këtë ajo e ka bindje!
