Efekti surprizë i Ajaxit vijon edhe në fazën gjysmëfinale të Ligës së Kampionëve, pasi holandezët arritën të triumfojnë në transfertën londineze ndaj Tottenhamit, me rezultatin minimal 0-1.
Van de Beek ishte autori i golit për “tulipanët”, me fantazistin që mori një asist të bukur nga Ziyech dhe nuk fali përballë portierit Hugo Lloris.
Me këtë fitore, holandezët hedhin një hap të rëndësishëm drejt kalimit në finale, ndonëse gjithçka do të vendoset në “Johan Cruyff Arena”, kur të luhet ndeshja e kthimit javën e ardhshme.
Ajaxi ka rezultuar një surprizë e vërtetë në këtë edicion të Ligës së Kampionëve, pasi ka eliminuar Realin e Madridit dhe Juventusin. Gjysmëfinalja tjetër, mes Barcelonës dhe Liverpoolit do të luajë nesër në mbrëmje aktin e parë në stadiumin “Camp Nou”, në Katalunjë.
