Akuzat e Arnaud Guedj nuk kanë kaluar pa reagim. Në Korçë ndihen të habitur nga fakti që francezi flet për diskriminim nga shqiptarët ndaj të huajve. Orges Shehi nuk ka ngurruar që të japë komentin e tij rreth deklaratës së ish-mesfushorit. I pyetur nga “Panorama Sport”, trajneri e nisi fjalën e tij me një tjetër pyetje:
“Kapiteni ynë a është gjë shqiptar?!”. Tekniku nuk e la me kaq, edhe pse nuk dëshironte që të ndalej gjatë. “Përgjigjja që dhashë më lart është shumë domethënëse. Në momentin që kapiteni ynë nuk është shqiptar, të jeni të sigurt që nuk mund të ketë probleme mes lojtarëve vendës dhe atyre të huaj.
Mjafton të flisni vetë me Radasin dhe fare mirë do të kuptoni se çfarë ndodh te Skënderbeu. Marko ka 8 vite këtu dhe nuk ka pasur probleme jo vetëm këtë vit, por as në të shkuarën”, shtoi durrsaku i stolit korçar. Guedj rrëfente se në ekip as nuk i pasonin, ndaj edhe Orges Shehi sqaron se performanca e lojtarit është parë në fushë dhe nevojë për shumë komente nuk ka.
“Të gjithë njerëzit marrin vesh nga futbolli. E shohin rendimentin e kujtdo në fushë. Pastaj kush e meriton do të luajë dhe ai i ka pasur minutat e veta”, përfundoi trajneri i bardhekuqve.
PANORAMASPORT.AL
