Një skandal në mes të ditës ka ndodhur në Beograd ku është kërcënuar me armë një nga figurat me të njohura të futbollit serb, menaxheri Nikola Damjanac. Ky i fundit, bashke me Fali Ramadanin, menaxhojnë kompaninë “LIAN Sports”, e cila la përveç emrave të njohur si Pjaniç, Joviç, Kulibali, Under apo Rebiç,Seferoviç, menaxhon edhe futbollistë shqiptarë duke filluar nga Armando Sadiku, për të vazhduar me Valon Behramin e Mërgim Bajramin.
Menaxheri Damjanac ishte në një restorant në Beograd bashkë me familjen e tij kur një person i është kundërvënë djalit të tij, Aleksa. Personi fillimisht kaloi pranë tavolinës së tyre dhe më pas u kthye dhe e qëlloi me shpullë 20-vjeçarin.
Një tjetër person goditi me grusht menaxherin, ndërsa ai që nisi sherrin nxori një pistoletë në mes të lokalit dhe e mbushi, duke u bërë gati të qëllonte. Vetëm ndërhyrja e shoqëruesve të tij shmangën tragjedinë dhe ai u largua, ndërsa po kërkohen ende motivet e kësaj ngjarje të rëndë që ndodhi të dielën.
Sipas mediave serbe, Damjanac ka marrë edhe më parë kërcënime dhe persona të ndryshëm e kanë kërcënuar që të mos vazhdojë më të jetojë në Serbi, si dhe të shkëpusë marrëdhëniet që ka me lojtarë të caktuar serbë.
