Analisti Baton Haxhiu, i njohur për qëndrimet pro kryeministrit Edi Rama, ka paralajmëruar se ndoshta deri në mbrëmje do të ketë ndryshim të rrjedhës politike në Ballkan.
Në një intervistë të drejtëpërdrejtë për Klan Kosova nga Berlini, Haxhiu ka treguar rreth asaj që po ndodh në samit.
Sipas tij, Zaev është shprehur se nëse nuk do të ketë hapje negociatash për Maqedoninë, ai do të japë dorëheqje.
“Ajo që ka ndodhur besoj se do të ndryshojë rrjedhën politike në Ballkan. Zaev është shprehur se nëse nuk hapen negociatat, është i gatshëm të japë dorëheqje. Ndoshta që në mbrëmje do të ketë ndryshime të rrjedhës politike në Ballkan”, tha Baton Haxhiu.
“Edhe mbrëmë edhe sot kemi parë dhe kemi dëgjuar dhe kemi qenë në takim me gjëra interesante. Ajo që po ndodh mund të jetë edhe fryma e ndryshimit, por jo sot.
Edhe Thaçi edhe Haradinaj kanë qenë në takim me Mogherinin, por takimi më interesant është ai mes Ramës, Zaev dhe Merkel”, tha ai.
Ndërkohë që Haxhiu ka shmangur komentet se çfarë do të ndodhë me Edi Ramën, do të japë ose jo dorëheqjen, nëse nuk ka hapje negociatash, ashtu sikundër pritet dhe që është paralajmëruar edhe nga mediat gjermane.
