Përpara zgjedhjeve lokale, Bashkia e Tiranës ka vendosur të vërë në shitje paketën e saj aksionare prej 34% që zotëron për klubin e futbollit Tirana. Lajmi është konfirmuar nga kryetari Erjon Veliaj, në një prononcim të dhënë për “ABC News”.
“Na është kërkuar edhe nga aksioneri i shumicës, por edhe nga tifozët që klubi të jetë i lirë, të marrë vendimet e veta. Ne do t’i ofrojmë për shitje ato aksione.
Besoj se me atë kënaqen të gjithë. Nuk ka asnjë alibi për vendimmarrje. Për sa kohë që kanë 100 % të vendimmarrjes së tyre, t’i marrin dhe aksionet e Bashkisë, nuk kam asnjë problem”, u shpreh Veliaj.
Kjo mund të konsiderohet një lajm i gëzueshëm për tifozët bardheblu, pasi edhe pse bashkia zotëronte 34% të aksioneve të K.F.Tiranës, nuk kontribuoi asnjë lekë në 4 vitet e fundit në menaxhimin e klubit.
Në mandatin 4-vjeçar në krye të bashkisë, Erjon Veliaj jepte vetëm premtime, herë publike e herë në mënyrë private, por kontribuoi 0 lek për klubin që e ka në pronësi.
Në marrëveshjen që u bë në dhjetor 2014, kur Refik Halili mori shumicën e aksioneve dhe u ra dakord që të ndante me bashkinë borxhin kolosal prej 2.6 miliardë lekësh (të vjetra). Sipas marrëveshjes, bashkia Tiranë duhej të shlyente 840 milionë lekë, nga të cilat ka shlyer vetëm 400 milionë.
Refik Halili, i vendosur nën presionin e gjyqeve në FIFA, apo gjyqeve në Shqipëri, ka shlyer sa ka mundur, por jo vetëm që pret nga bashkia shlyerjen e borxhit 440 milionë lekë, por nuk ka marrë asnjë lek në 4 vitet e fundit për menaxhimin e klubit, edhe pse bashkisë i takon të kontribuojë në bazë të 34% të aksioneve që zotëron.
Ndoshta mjaftohet me faktin se në dobi të klubit u vunë në përdorim asetet, nga stadiumi deri tek ambientet stërvitore, por marrëveshja nuk ka qenë e tillë dhe është e qartë që ekziston një ngërç i madh, që është shmangur vetëm nga butësia dhe durimi i Halilit, i cili kohët e fundit jo rastësisht i bënte thirrje të shpeshta bashkisë të shesë aksionet e saj, sepse dy pronarë realë, apo më shumë të tillë, janë më mirë se Halili dhe një bashki inekzistente.
