Universitetet europiane kanë qenë zgjedhje për shumë studentë shqiptarë për të kryer cikle të ndryshme të studimeve të larta. Numri i të diplomuarve nga Shqipëria në një nga universitetet e BE-së është rritur në vitet e fundit akademike.
Në 2016-n, sipas të dhënave të Eurostat, janë diplomuar në sistemin terciar 2477 studentë nga Shqipëria, rreth 7% më shumë në krahasim me një vit më parë, që ishin 2312 të diplomuar. Për vitin 2017, Eurostat nuk i ka publikuar ende të dhënat për të gjitha shtetet anëtare. Në sistemin terciar përfshihen disa cikle studimi si: të diplomuarit në Bachelor, të diplomuarit në ciklin e dytë master dhe doktorantët.
Në 2017-n kanë marrë një diplomë Bachelor në një nga universitetet e BE-së 1341 studentë shqiptarë, rreth 1038 kanë marrë diplomën për përfundimin e studimeve master dhe kanë përfunduar doktoratën rreth 99 kandidatë shqiptarë.
Pjesa më e madhe e tyre janë diplomuar në universitetet italiane, me 67% të totalit të të diplomuarve. Pas Italisë, me një diferencë të konsiderueshme, renditet Greqia, ku u diplomuan 112 shqiptarë në të tria këto nivele (5% e totalit), e ndjekur Anglia me 101 studentë dhe Gjermania me 91 studentë. Për sa u përket studimeve master morën diplomë 1,038 studentë shqiptarë, prej të cilave 693 studente femra. Ndërsa doktoratën e përfunduan 99 doktorantë nga Shqipëria.
Shqiptarët që studiojnë jashtë
Studentët shqiptarë që kanë zgjedhur të studiojnë në universitetet në vendet e BE-së dhe kandidatet për t’u anëtarësuar në 2016-n janë afërsisht 15,500 sipas Eurostat (në këtë shifër nuk janë përfshirë Gjermania dhe Holanda).
Në krahasim me një vit më parë, sipas të dhënave të publikuara, numri i studentëve shqiptarë në BE ka rënë me gati 1000 studentë, pa përfshirë shtete ku të dhënat mungojnë për të dy vitet. Italia ka numrin më të madh të studentëve shqiptarë, ku në 2016-n, sipas të dhënave të Eurostat, studionin rreth 10,724 studentë shqiptarë në universitetet italiane. Në krahasim me një vit më parë, numri i tyre ka rënë me rreth 724 studentë.
Në vend të dytë për numrin më të lartë të studentëve shqiptarë qëndron Greqia, ku numri i studentëve shqiptarë të regjistruar në universitetet greke është 1633, sipas Eurostat. Në vend të tretë është Turqia, me 886 studentë. Numri i studentëve shqiptarë që kanë zgjedhur të studiojnë në universitetet e Turqisë është rritur në tre vitet e fundit. Një vit më parë ishin të regjistruar rreth 775 studentë, ndërsa në 2014 ishin 644 studentë.
Edhe studentët shqiptarë në Gjermani janë në një numër të konsiderueshëm krahasuar me totalin e studentëve që kanë zgjedhur të studiojnë në një fakultet jashtë Shqipërisë. UNESCO ka raportuar se në Gjermani studionin në 2015-n rreth 559 studentë. Ndërsa në Francë, numri i studentëve shqiptarë në 2016-n ishte 481, rreth 10 studentë më pak.
Numri i studentëve shqiptarë në Austri ishte 324 studentë, apo rreth 39 studentë më shumë se një vit më parë.
Në vendet e Europës Lindore, në Bullgari dhe Rumani, Eurostat raporton se numri i studentëve shqiptarë që studiojnë në universitetet atje është 279 dhe 202 studentë. Numri i studentëve shqiptarë në Mbretërinë e Bashkuar, që ka disa prej universiteteve më të mira në botë, është 260.
