Ibrahim Lici, 26 vjeç, është shpallur në kërkim si i dyshuari kryesor i vrasjes së vëllezërve Bilali, më 30 mars në Shkodër. Krim që dyshohet se ka lidhje me sagën e vrasjeve që ka tronditur muajin e fundit qytetin verior.
Ibrahim Lici është djali i dytë i këshilltarit bashkiak Mustaf Lici. 26 vjeçari i shpëtoi në verën e vitit 2018 një kurthi që i ngritën për ta vrarë një grup rival. Gjatë sagës së vrasjeve të ndodhura përgjatë vitit 2018, Mustaf Lici deklaronte se familja e tij po përndiqej dhe se po ushtrohej terror policore megjithëse familja e tij ishte e dëmtuar pas vrasjes së Fatbardh Licit.
“Çdo fishek që hidhet në Shkodër pa vrasje e pa asnjë, rrethohet familja, dhe i marrin në komisariat, sa të gjejnë. Do t’i drejtohemi Strasburgut. Por ta dinë mirë se as shteti as bandat se trembin dot familjen Lici”, shprehej Mustaf Lici më 2 shtator 2018.
KRIMET NË SHKODËR
Atentati ndaj Lulzim Kullës u pasua nga atentate të njëpasnjëshme ku, deri tani, kanë mbetur të vrarë 9 persona ndërsa dy të tjerë figurojnë të zhdukur.
13 janar 2018, atentat kundër biznesmenit Lulzim Kulla në afërsi të tregut popullor të qytetit të Shkodrës.
Qershor 2018, zhduken pa gjurmë Gëzim Hysa dhe nipi i tij Agron Molla.
18 qershor 2018, ekzekutohet me armë Mehdi Kavaja, pronar i një servisi.
15 korrik 2018, vriten në një atentat, në hyrje të banesës, ish-polici Boran Bercana dhe Silvi Ndoci, bashkëjetuese me të.
8 gusht 2018, vritet Fatbardh Lici, kunati i Lulzim Kullës dhe vellai i Mustafë Licit. Ky i fundit këshilltar bashkiak dhe drejtues i një partie politike me shtrirje lokale.
1 shtator 2018, vritet biznesmeni Arjan Ferracaku teksa po kalëronte bashkë me Asmir Bilalin. Dyshohet se autorët e atentatit ngatërruan shenjestrën.
14 nëntor 2018, në tregun popullor të Rusit vritet Fatos Ferracaku, kushëriri i Arjan Ferracakut.
20 mars 2019, në fshatin Grudë vritet Nard Polia, pronar i një bujtine në Theth, pjesëtar i administratës së Zonave të Mbrojtura.
30 mars 2019, vriten në derën e shtëpisë së tyre vëllezërit Bilali.
/BN/
