Nga Boldnews.al
E ngarkuara me punë e SHBA-ve në ambasadën amerikane në Tiranë Leyla Moses-Ones, (kur kishte ambasador ishte në radhën e tretë pas tij), ka lëvduar sot policinë shqiptare për punën e bërë kundër terrorizmit. Sipas saj organizata e policisë shqiptare, në këtë drejtim, por edhe në fusha të tjera është ndër më të mirat në Europë.
“Institucionet shqiptare kanë bërë një punë mbresëlënëse gjatë 2 viteve të fundit në ndërtimin e kapaciteteve për të luftuar terrorizmin. Kohët e fundit policia arrestoi një individ të lidhur me terrorizmin. Më lejoni ta mbyll duke falënderuar Ardi Veliun dhe policinë e shtetit për luftën kundër terrorizmit. Policia e Shtetit në Shqipëri vazhdon të ndërtojë një emër si një nga organizatat e policisë më të mira në Evropë”, deklaroi Leyla Moses-Ones.
E nëse ka “shkëlqyer” në luftën kundër terrorizmit, kjo polici, që i funksionoka vetëm një sektor, (që edhe kjo duhet parë me dyshim), në raportin e Departamentit Amerikan të Shtetit, nuk shkëlqen hiç, madje është kthyer në problem serioz.
“Shqipëria është një vend burim i kanabisit. Shqipëria është shndërruar në rritje në një vend tranziti për kokainën dhe heroinën, që komandohet gjerësisht nga elementë të krimit të organizuar që lëvizin drogat e paligjshme nga vendet e burimit drejt tregjeve evropiane. Droga e sekuestruar dhe arrestimet janë shtyrë gjerësisht nga bashkëpunimi me partnerët ndërkombëtarë dhe presioni në rritje ndërkombëtar. Evidentohet ndërtimi i laboratorëve të përpunimit të kokainës dhe të heroinës në Shqipërinë qendrore dhe veriore”. Këto janë gjetjet e Departamentit Amerikan të Shtetit për vitin 2018 përsa i përket kultivimit dhe trafikimit të lëndëve narkotike nga Shqipëria.
Padyshim që ky nuk është vlerësim për “policinë më të mirë në Europë”…! Po nëse lëvdatat pa karar i mori për çështjen e terrorizmit, po ngjarja në Rinas a kishte elementë të terrorizmit? Pesë persona të armatosur rëndë u futën në barkun e avionit me 104 pasagjerë.
Morën çdeshëm, (thasët me para të tre bankave) dhe ikën. Dhe këta grabitës i kishin të gjithë mundësitë ta rrëmbenin atë avion, që desh Zoti nuk ndodhi. Gjithçka ishte në dorë të tyre, por fatmirësisht nuk u shënua ky akt i mirëfilltë terrorist.
E dërguara me punë në ambasadën amerikane në Tiranë me emër të përvetshëm falënderoi kryepolicin tonë. Po Klement Balili a i kujtohet të dërguarës me punë? Padyshim që po, pasi një vit më parë ndonëse diku nga radha e tretë pas ambasadorit dhe zyrtarëve të tjerë, kishte dëgjuar për këtë emër, si “Eskobari i Ballkanit”, që ish-ambasadori Lu nuk linte rast pa e përmendur.
Kryepolici ynë, që Leyla Moses-Ones vlerësoi me superlativa u bë “shofer” i Balilit. Në makinën e tij udhëtoi kryetrafikanti nga Delvina në Tiranë në momentin e vetëdorëzimit para kamerave dhe mbështetësve të shumtë, miq, shokë, bashkëqytetarë dhe farefis. U përcoll si të ishte daja i dhëndrit që po shkonin për të marrë nusen, jo si më i shumëkërkuari në vend.
Cili kryepolic ndër ata më të mirët në Europë do e bënte këtë! Ndaj në këtë rast duhet ndarë njëherë e përgjithnjë ose i duhet besuar DASH-it, që e nxin problemin e trafikimit dhe kultivimit të narkotikëve ose Leylas!
