Nga Boldnews.al
Në vend janë 128 parti të regjistruara, më e fundit është ajo e Astrit Patozit “Bindja Demkoratike” quhet. Shumicës së partive nuk u dihet as kryetari, as programi, e mbi të gjitha nuk kanë adresë dhe anëtarësi. Ndoshta edhe familja e tyre nuk i voton, por histerizmi i krijimit të partive politike sapo ka nisur.
Keni dalë në televizor, u bëtë deputetë rastësisht, e dini çështjë mjalti i pushtetit? Mjafton vetëm kaq! Këta janë kriteret për të hapur një parti të re, e nëse nuk mundesh për të mbledhur 3 mijë nismëtarë sikurse e kërkon ligji, në çdo rast gjenden 2999 Rilindas, që të ndihmojnë për firmat…
Është pak të konsiderohen qesharake, por katandisja politike është kthyer në telendisje me dëshirë. Përveç Patozit që sot e sheh veten kryetar dhe shpreson që opozita e vërtetë të mos marrë pjesë në zgjedhje, edhe partiza të tjera të pompuara artificialisht ngrenë krye për të shqyer një thelë nga “kofsha e pushtetit”.
Dje u regjistrua në KQZ për të marrë pjesë në zgjedhjet e 30 qershorit edhe Partia “Libra” e Ben Blushit. Edhe ai një njeri i “idhnuar” me të tijët, ashtu si Patozi. Sot Rama ka nevojë për ta, por nuk do i kushtojnë shtrenjt kryetarë të tillë partish që krenohen me vulën që mbajnë gjithnjë me vete.
Kryeministri është i qetë dhe i gatshëm të pranojë çdo ofertë që vjen për krijimin e një partie të re, sidomos nëse ajo thotë se është në opozitë me pushtetin. Nëse nuk arrijnë të mbledhin 3000 firma, urdhërohet pushteti i Rilindjes që ta japin ata firmën.
Jemi në një tallava politike, ku gjithkush edhe me zë të “stonuar” kërkon të këndojë këngën e tij. Deputeti i grupit të pavarur në Parlament, Ralf Gjoni, duke folur për krijimin e partisë “Bindja Demokratike” tha se edhe atyre i është kërkuar formimi i një partie për t’u futur në zgjedhje.
“Nëse është regjistruar në gjykatë me mbetet vetëm ti uroj fat të mbarë përfaqësuesve dhe drejtuesve të kësaj partie politike. Personalisht nuk kam prioritet krijimin e partive politike, por është ndryshimi i sistemit zgjedhor. Po nuk u ndryshua sistemi zgjedhor është e qartë se ne nuk mund të kemi zgjedhje si ato të 2017 apo më parë”, u shpreh ai.
Dikush del dhe bën parti, një tjetër thotë unë do e ndryshoj sistemin brenda institucioneve, njëri sheh ëndërr sikur i thanë që duhet ta pranosh mandatin e deputetit, tjetri thotë: “nuk kam ardhur për një rrogë të qelbur deputeti, por për të dhënë kontribut për të mirën e vendit”. Në fund Rama vetëm qesh, tall, përbuz dhe përkedhël kokën e “qenushëve” me partiza të reja. Ata janë opozita e emëruar, jo e zgjedhur…!
