Në shtetin fqinj të Greqisë janë bërë tre operacione të mëdha antidroge ku kanë rënë në pranga pesë shtatas shqiptarë.
Në operacionin e parë është goditur një grup kriminal, që importonte heroinë të pastër nga Irani për ta përpunuar në Greqi si dhe kokainë e kanabis për ta shpërndarë më tej në tregun vendas.
Mësohet se ‘kokat’ e bandës ndodhen në burg. Gjatë operacionit u zbuluan depot, 2 laboratorë me të gjitha pajisjet si dhe u sekuestruan 44 kg e 475 gr heroinë, 10 kg e 800 gr pluhur për perzierjen e lëndëve narkotike, pistoletë, automjete, motora, celularë.
Në operacionin e dytë që u zhvillua po në zonën e Atikës u arrestua një 46 vjeçar shqiptar, për transportin e 75 kg dhe 100 gr kanabis të papërpunuar.
Në vijim të operacionit, u arrestua një tjetër shqiptar 37 vjeç, në shtëpinë e të cilit u gjendën 732 kg dhe 660 gr kanabis e papërpunuar, si dhe në një tjetër depo u sekuestruan 7 kg dhe 435 gr kokainë dhe 10 kg kanabis, bashkë me 3 peshore dhe 6 celularë dhe 540 euro nga tregtia e drogës. Droga kishte vlerë në tregun e pakicës mbi 1 milionë euro.
Operacioni i tretë u krye në zonën e Pireut, ku u arresuan disa persona mes tyre edhe shqiptarë, që akuzohen për tregtimin e lëndës narkotike në tregun vendas. Në total u sekuestruan 10 kg e 657 gr kanabis, 84 gr kokainë dhe 51 fidanë kanabis, bomba dore si dhe peshore.
