Të tjera detaje janë zbuluar në lidhje me grabitjen e miliona eurove në pistën e aeroportit të Rinasit, ngjarje e ndodhur më 9 prill.
Gazetarja Klodiana Lala ka mundur të kontaktojë me telefon pronarin e servis “Genti” që ndodhet në rrugën e vjetër Elbasan-Rrethrrotulimi i Bradasheshit, aty ku dyshohet se u modifikua enkas për grabitjen furgoni me mbishkrimin “Hetimi Tatimor” dhe sjell dëshminë e tij.
Pronari i servisit, shtetasi Gentian Sharra ka konfirmuar se servisin ia kishte dhënë me qira shtetasit Eldi Çala.
“Nuk kisha kontratë noteriale me të sepse është në proces legalizimi. Nuk kam dijeni për aktivitetin e paligjshëm që është kryer në këtë servis”, ka thënë ai.
Ky servis, siç tha gazetarja Lala, është i kyçur tashmë dhe konsiderohet provë materiale për prokurorinë dhe policinë.
