Personat e ndaluar nga policia si të dyshuar se kanë gisht në grabitjen e një sasie të konsiderueshme monetare në aeroportin e Rinasit pasditen e 9 Prillit, mësohet se kanë dy vite nën vëzhgim nga policia.
Burime pranë grupit hetimor thanë për “Boldnews.al” se Alkond Bengasi, Saimir Çela (i cili njihet edhe me pseudonimin Tale), dhe Renaldo Sula, janë pjesë e një grupi që janë mbajtur nën vëzhgim nga policia për dy vite, të pagëzuar si “akrobatët”. Kjo, pasi dyshohet se janë autorë të disa grabitjeve në Elbasan.
Këtë të hënë, policia konfirmoi arrestimet e pjesëtarëve të grupit si të dyshuar se kanë gisht në grabitjen e Rinasit. Kjo vjen në një kohë, kur prej dy vitesh ata mbahen në vëzhgim.
Mbetet e paqartë sesi teksa ishin nën vëzhgimin e policisë, ‘akrobatët’ kanë marrë pjesë në grabitjen e bujshme të 9 Prillit.
Nëse akuza e ngritur provohet nga gjykata, krijohen dyshime se policia ka çeduar në punën e saj për të mbajtur nën survejim anëtarët e grupit. /Boldnews.al/
