Të paktën 207 persona humbën jetën pas sulmeve kamikaze në kisha dhe në hotele me pesë yje në Sri Lanka të dielën e Pashkëve. Tetë shpërthime u regjistrua në vende të ndryshme. Vala e parë solli gjashtë sulme në tre hotele luksoze dhe në tre kisha.
Pak orë më vonë u regjistrua sërish një shpërthim më i vogël në periferi të kryeqytetit. Policia tha se aty humbën jetën dy persona. Më vonë pati një tjetër shpërthim në periferi të Kolombos.
N.A Sumanapala, pronari i një dyqani pranë kishës Shën Antoni në Kolombo thotë se ishte i pari që nxitoi për të dhënë ndihmë kur dëgjoi shpërthimin.
“Prifti doli nga kisha i mbuluar me gjak,” tha ai për Nju Jork Tajms. “Ishte një masakër e vërtetë”.
Një tjetër dëshmitar tha për CNN se copa trupash ishin shpërndarë në kishë. Gjithçka ndodhi pak pas meshës së Pashkëve. Mes viktimave janë edhe të paktën 35 të huaj, kryesisht britanikë dhe amerikanë.
Ky ishte sulmi më i dhunshëm në Sri Lanka që prej fundit të luftës civile në vitin 2009. Qeveria ka shpallur gjendjen e jashtëzakonshme dhe ka ndaluar median sociale me qëllim pengimin e shpërndarjes së informacioneve false.
Menaxheri i një hoteli luksoz tha se një kamikaz ishte në radhë në bufenë e mëngjesit kur hodhi veten në erë.
Deri më tani asnjë grup nuk e ka marrë përgjegjësinë për sulmet. Ndërkohë javën e shkuar pati një paralajmërim për një sulm të mundshëm terrorist islamik mbi kishat e vendit, shkruan Daily Mail.
Burimet policore thonë se janë arrestuar tetë persona për sulmet deri më tani.
